Алматы қаласының әкімі Дархан Сатыбалды коммуналдық жәрмеңкелерді дамыту және жаңғырту мәселесі бойынша жұмыс кеңесін өткізді, – деп хабарлайды aqshamnews.kz тілшісі.
Жиында қазіргі жағдай, жаңа нысандар салу жоспары, сондай-ақ халыққа өнімнің қолжетімділігін арттыру және кәсіпкерлер үшін қолайлы орта жасау жайы талқыланды.
Қалада заманауи жәрмеңкелердің бірыңғай тұжырымдамасы қалыптасып жатқаны атап өтілді. Бұл стандартталған дизайн енгізу, инфрақұрылымды жетілдіру және сауда үдерісінің ашықтығын қамтамасыз етуге бағытталған. Жоба аясында аумағы 850 шаршы метрден асатын жаңа сауда алаңдарын ашу жоспарланған. Онда жабық және ашық павильондар, қоғамдық тамақтану орындары, автотұрақтар және көріктендірілген аумақ қарастырылады. Сондай-ақ, 150-ден астам отандық өндірушінің қатысуы қамтамасыз етіліп, әлеуметтік маңызы бар өнімдерді кең ассортиментте әрі қолжетімді бағамен ұсынуға мүмкіндік беріледі.
Кейбер жобаларды қаланың түрлі аудандарында, соның ішінде «Қазақфильм» шағынауданы мен Өтеген батыр көшесі бойында іске асыруға басымдық беріледі. Алдын ала есептеуге сәйкес, жәрмеңкелердің жаңа форматы тұрақты экономикалық модель қалыптастырып, жобаларды кеңейтуге жол ашады.
Қала әкімі құрылыс мерзімін сақтау мен санитарлық әрі құрылыс талаптарын қатаң орындау қажеттігін ерекше атап өтті.
Кеңес қорытындысы бойынша жер телімдерін рәсімдеуді жеделдету, инвесторлармен жұмысты жүйелеу және коммуналдық жәрмеңкелерді басқару тиімділігін арттыру бойынша нақты тапсырмалар берілді.