Алматы қаласының әкімі Дархан Сатыбалды Қазақстанға ресми сапармен келген Қытай Коммунистік партиясы Орталық комитеті Саяси бюросының мүшесі, ҚКП ОК Саяси-құқықтық комиссиясының хатшысы Чэнь Вэньцинмен кездесу өткізді, – деп хабарлайды aqshamnews.kz тілшісі.
Кездесу барысында тараптар Қазақстан мен Қытай арасындағы стратегиялық серіктестікті одан әрі нығайту, өңіраралық ынтымақтастықты дамыту, сауда-экономикалық және инвестициялық байланыстарды кеңейту, сондай-ақ мәдени-гуманитарлық саладағы өзара іс-қимыл мәселелерін талқылады.
Дархан Сатыбалды екіжақты ынтымақтастықтың жоғары деңгейі Қазақстан Республикасының Президенті Қасым-Жомарт Тоқаев пен Қытай Халық Республикасының Төрағасы Си Цзиньпин арасындағы сенімді диалог пен стратегиялық бағыттың арқасында қамтамасыз етіліп отырғанын атап өтті. Оның айтуынша, екі ел арасындағы қарым-қатынас көптеген бағыт бойынша дәйекті түрде нығайып келеді.
Әкім Алматының Қазақстандағы ең ірі экономикалық, қаржылық, туристік және білім беру орталығы екенін айтып, мегаполис үшін Қытаймен ынтымақтастықтың стратегиялық маңызға ие екенін жеткізді. Әсіресе көлік-логистикалық инфрақұрылымды дамыту, туристік ағынды арттыру, Алматы мен Қытай қалалары арасындағы тікелей әуе қатынасын кеңейту, сондай-ақ бірлескен инвестициялық жобаларды жүзеге асыру мәселелеріне ерекше назар аударылды.
Өз кезегінде Чэнь Вэньцин мемлекет басшылары арасындағы өзара сенім мен стратегиялық әріптестікке негізделген Қазақстан-Қытай қатынастарының жоғары деңгейін атап өтті. Ол экономика, инвестиция, көлік байланысы, қауіпсіздік, туризм, білім беру және мәдени алмасу салаларындағы ынтымақтастықты одан әрі кеңейтудің маңыздылығына тоқталды.
Қытай тарапының өкілі сондай-ақ «Бір белдеу — бір жол» бастамасы аясында Алматымен өңіраралық байланысты нығайтуға, бірлескен жобаларды дамытуға және гуманитарлық байланыстарды кеңейтуге мүдделі екенін білдірді.
Тараптар білім беру және мәдени ынтымақтастықтың белсенді дамуын, сондай-ақ 2026 жылы Қазақстан мен Қытай мәдениетінің өзара жылы өткізілетінін ерекше атап өтті.
Чэнь Вэньцин жылы қабылдау үшін алғыс айтып, Алматының екі ел арасындағы ынтымақтастықты нығайтудағы маңызды рөлін атап өтті.