Алматы қаласының әкімі Дархан Сатыбалды реновация бағдарламасы бойынша 1950-1960 жылдары салынған ескі үйлер орналасқан Розыбакиев – Катаев – Радостовец көшелерінің аумағындағы жағдаймен танысты.
Ауданда «Camh Realty» ЖШС компаниясы «Наследие» тұрғын үй кешенінің құрылысын жүргізуде, сондай-ақ «ВЕК-Тұмар» ЖШС және «ПКС» ЖШС компаниялары да ескі үйлерге қатысты жұмыстармен айналысып жатыр.
Тұрғындар 2030 жылға дейін тозығы жеткен және жаңарту бағдарламасына енгізілген үйлері шешімсіз қала ма деген алаңдаушылықтарын да жеткізді.
Дархан Сатыбалды тұрғындардың мүдделеріне басымдық беру керектігін атап өтті.
«Инвесторлардың адамдарды тозығы жеткен ескі үйлерінде қалдырып, тек бос жатқан немесе ең тартымды жерлерді таңдауына жол бермеу керек. Егер компания аумақты алса, онда онымен бірге ескі тұрғын үйді бұзу және қоныстандыру мәселесін шешуге де міндетті. Біз барлық тараптарды бір үстел басына жинап, нақты шешімдерді талап ететін боламыз. Егер құрылыс салушылар одан жалтарса, оларды бұл жобалардан шеттетеміз», - деді әкім.
Кездесу қорытындысы бойынша Сәулет және қала құрылысы басқармасы құрылыс салушылармен бірлесіп, қайта жаңарту бағдарламасына енгізілген жер телімдерінің салынып жатқан білім беру мекемесінің шекарасымен түйіспеуін нақтылау жөнінде уағдаластыққа қол жеткізілді.