Алматы қаласының әкімі Дархан Сатыбалды Тұрғұт Озал көшесінде орналасқан «№58 жалпы білім беретін мектеп» КММ ғимаратына жапсарлас салынған қосалқы нысанды қайта құру алаңына барды.
Жоба бойынша мұнда мектеп жанынан заманауи оқу және спорт үй-жайы бар 576 орындық қосымша нысан салынуға тиіс. Жұмыс 2024 жылдың шілдесінде басталды, ал келісімшарт бойынша 2025 жылдың желтоқсанында аяқталуы керек еді. Алайда, құрылыс бекітілген кестеден едәуір артта қалып отыр.
Әкім балалардың оқуға орны жоқ екенін, сондықтан жағдай шұғыл шешуді талап ететінін атап өтті. Мердігерге кемшілікті жою үшін екі апта мерзім берілді. Қала басшысы жұмыс барысын күнделікті бақылау және қаражатты ашық пайдалану қажеттігін атап өтті.
«Мерзімі екі апта. Біз жұмыстың қарқынын қадағалаймыз, күн сайын маған жағдай туралы баяндайсыздар. Нысан менің жіті бақылауымда. Егер ешқандай өзгеріс болмаса, біз шартты бұзамыз. Мердігерлер жұмысты қосалқы мердігерлерге ауыстырудың орнына өз күштеріне сенуі керек», - деді Дархан Сатыбалды.
Білім басқармасына, Құрылыс басқармасына және жауапты қызметтерге нысанды ерекше бақылауға алу және жұмыс барысы туралы апта сайын баяндау тапсырылды.
Қайта құру аясында жертөлесі мен спорт залы бар жаңа үш қабатты корпус салу, асхана мен акт залы бар блок тұрғызу, заманауи стандарттарға сәйкес жұмыс істеп тұрған мектеп үй-жайларын қайта жоспарлау және жаңарту, сондай-ақ инженерлік желілерді, шатырды және өрт қауіпсіздігі жүйелерін ауыстыру көзделген.
