Алматы қаласы әкімдігінің қолдауымен мегаполистегі ең әсем әрі мүгедек жандардың кіріп-шығуына барлық жағдай жасалған «Ритц Палас» сауда-ойын-сауық үйінің ішіндегі «Ritz Hall» банкет залында мүмкіндігі шектеулі жеткіншектер мен оларды бағып-қағып отырған ата-аналарына жарқын мереке ұйымдастырылды.
– Мұндай мейрамды екінші рет өткізіп отырмыз. Түрлі диагнозы бар мүмкіндігі шектеулі 100 баланы ата-аналарымен бірге мерекелік дастархан басына шақырып, салтанатты думан сыйлап жатырмыз. Өздеріңіз де көріп отырсыздар, осынау еңселі жарық ғимаратта кішкентай достарымыз көңілді музыкаға билеп, ата-аналары да қосыла ән шырқап, суретке түсіп, мәз-мейрам. Мұндай мереке-думан әлі де жалғасады. Барлық баланың әр күні жарқын болсын деп тілейміз, – дейді Алматы қаласы Жұмыспен қамту және әлеуметтік бағдарламалар басқармасының басшысы Бауыржан ЖАУБАСОВ.
Иә, қызылды-жасылды шарлармен көмкерілген, ән-жырға бөленген жап-жарық залда үлкен-кіші бірдей мерекені сезіне білді. Балалар алып аниматор қос аюмен кезек-кезек суретке түсіп, би билеп, ерекше мәз. «Аюлардың» да өздерін қызықтап, түртіп көріп жатқан балдырғандарды бауырына басып құшақтап жатқан сәттері тіпті әсерлі!
«Ritz Hall» залының балалардың көңіл көтеруіне қолайлы террасасында кішкентай достарымыз ойын-сауық бағдарламасына қатысты. Конкурстық ойындарға атсалысты. Көңілді аниматорлар, клоундар да балалар мерекесінің көрігін қыздырды. Аспанда әуелеген сабынды мөлдір көбіктерді ұстауға талпынған балдырғандар да өз алдына мәз-мейрам. Декоративті тышқан, қоян, макака, тасбақа, қолтырауындар да балалардың таңданысын тудырып, бәрі жамырай ұстап көріп, қуаныштары еселене түсті.
Мереке соңында барлық балаға сыйлық тарту етілді.