2025 жылдың бірінші жартыжылдығында мегаполиске 1,1 миллион турист келген - бұл өткен жылмен салыстырғанда 6,5%-ға көп. Олардың 320 мыңы шетелдік қонақтар. Бұл туралы Алматы қаласы әкімінің орынбасары Олжас Смағұлов Өңірлік коммуникациялар қызметінің баспасөз конференциясында айтты.
Айтуынша, көрсетілген туристік қызметтердің көлемі 50 млрд теңгеден асты (+16,6%). Негізгі өсім Үндістан, Қытай, БАӘ және Малайзиядан келген туристер есебінен қамтамасыз етілген. Салалық инвестициялар сегіз айда 104 млрд теңгеге жетіп, 62,7%-ға артқан, ал салық түсімдері 28,6%-ға өсіп, 59,3 млрд теңгені құраған.
Туризмнің дамуына әуе қатынасының кеңеюі де ықпал етуде: 2025 жылы Гуанчжоу, Инин, Шанхай, Дананг, Аланья және Ош қалаларына жаңа рейстер ашылды. Mastercard деректері бойынша, шетелдік турист Алматыда тәулігіне орта есеппен $441 жұмсайды - бұл ішкі туристерге қарағанда 8,7 есе көп. Қала «қала + тау» бағытындағы аралас маршруттарды, оқиғалы туризмді, гастротурларды және экономикалық қайтарымы 3–4 есе жоғары іскерлік туризмді (MICE) белсенді дамытып келеді.
«Қазіргі уақытта жалпы құны 300 млрд теңгені құрайтын 21 қонақүй құрылысы жүріп жатыр. Олардың қатарында Hilton, St. Regis, Marriott, Radisson және Tapestry by Hilton брендтері бар. Бесеуі - 5 жұлдызды қонақүйлер», - деді Алматы қаласы әкімінің орынбасары Олжас Смағұлов.
Алматы біртіндеп өңірдің танымал туристік брендіне айналуда - мәдениет, табиғат және инновация тоғысқан, әрбір қонаққа ерекше әсер сыйлайтын қала.