Алматы әкімінің орынбасары Алмасхан Сматлаев Алматы қаласы Төтенше жағдайлар департаментінің өрт сөндіру-құтқару бөлімшесіне барды. Ол жедел қызметтің жұмысымен, техникалық жарақтандыру деңгейімен және азаматтық қорғау жүйесін жаңғырту барысымен танысты.
Аталған сапар Мемлекет басшысының тапсырмаларын орындау аясында өтті. Соған сәйкес, қала инфрақұрылымын дамытуда азаматтар мен туристердің қауіпсіздігін қамтамасыз ету басымдық болып қала береді.
«Әкімдіктің қолдауымен алдын алу шаралары қабылданып, күштер мен құралдардың тұрақты дайындығы қамтамасыз етіледі, оның ішінде су тасқыны кезеңіне дайындық та бар. Жүйелі профилактикалық жұмыс пен материалдық-техникалық базаны жаңарту жедел әрекет ету тиімділігін арттырып, тұрғындардың қорғалу деңгейін күшейтуге мүмкіндік береді», – деді Алматы әкімінің орынбасары Алмасхан Сматлаев.
Бүгінде Алматының ТЖД гарнизоны республика бойынша ең жақсы жарақтандырылған бөлімшелердің бірі саналады. Жарақтандырылу деңгейі 97%-ға жетеді. Құтқарушылардың иелігінде 160-тан астам техника бірлігі бар. 2025 жылы жергілікті бюджет есебінен департаментке 33 бірлік заманауи техника жеткізілді. Оның ішінде апаттық-құтқару көліктері, өрт сөндіру автосатылары, реанимобильдер, автоцистерналар және арнайы техника бар.
Алматы қаласы ТЖД басшысы Дамир Ермағамбетовтің айтуынша, 2025 жылы Алматы қаласында ТЖМ құтқару бөлімшелері апаттық-құтқару және шұғыл жұмыстарды жүргізу үшін 17 мыңнан астам шақыртуға шыққан, оның ішінде таулы аймақтардағы жұмыстар да бар. Төтенше жағдай аймақтарынан шамамен 1 мың адам құтқарылып, эвакуацияланған.
Биыл қаңтарда таудағы құтқару жұмысы барысында 18 турист, оның ішінде шетел азаматтары да құтқарылды.
Алматының өртке қарсы қорғанысын 22 өрт сөндіру бөлімшесі қамтамасыз етеді. Инфрақұрылымды кезең-кезеңімен жаңарту аясында екі өрт сөндіру депосының құрылысы аяқталды, ақпан айының соңында тағы екі бөлімше ашу жоспарланып отыр. Сонымен қатар, Шұғыла шағынауданында өрт депосы салынып жатыр, «Медеу» мемлекеттік табиғи паркінің аумағында РОСО құтқару бекеті ашылды, ҚР ТЖМ-нің «Алатау» оңтүстік базасын дамыту жоспары іске асырылуда.
Бұған қоса, жергілікті бюджет қаражаты есебінен өрт сөндіру бөлімшелерінде жөндеу жұмыстары жүргізілді, 101 және 112 жедел байланыс желілері жаңғыртылды, бейнебақылау және өртті ерте анықтау жүйелері енгізілді, сондай-ақ жаңа құтқару жабдықтары сатып алынды.