Танымал зілтемірші Алмас Өтешовтің кейінгі тағдыры көпшілікті алаңдатқаны белгілі.
Әсіресе, спортшының әріптесіміз Нұрсейіт Жылқышыбайға берген сұхбатынан кейін бұл тақырыпқа деген қоғамның назары арта түсті. Бұл туралы Aqshamnews.kz сайты хабарлайды.
Сыр елінен қолдау: Алмас Өтешов қайта қатарға қосыла ма?
Жуырда Қызылорда облысының әкімі Нұрлыбек Нәлібаев аймақтың спорт басқармасының басшысы Бахтияр Артаевқа Алмас Өтешовке қолдау білдіруді тапсырды. Өз кезегінде Бахтияр Артаев ауыр атлетпен арнайы кездесіп, оның алдағы жоспарларын талқылады. Өзі де спортшы болғандықтан, Бахтияр Ғарифоллаұлы Алмасқа жан-жақты қолдау көрсетуге ниетті екенін жеткізді.
Алмас Өтешовтің басты сұраныстарының бірі – кезінде өзіне берілген пәтерді жекешелендіру. Қазіргі таңда бұл мәселені заңгерлер қарастырып, құқықтық жолдарын зерттеуде. Қызылорда қаласының әкімі Нұржан Ахатов та бұл мәселеге назар аударып, заң аясында көмектесуге дайын екенін мәлімдеді.
Жаңа жұмыс – жаңа мүмкіндік
Кәсіпқой спорттан кейінгі басты мәселелердің бірі – тұрақты жұмыс табу. Алмас Өтешовке Қызылордадағы спорт мектептерінен 1,5 ставка көлемінде жаттықтырушы қызметі ұсынылған. Алайда, спортшы өзінің мүмкіндіктерін ескере отырып, әдіскерлік қызмет атқарғысы келетінін білдірген. Осыған байланысты, "Қайсар" футбол клубының директоры Талғат Абдығаппар Алмасты қабылдап, оған қызмет ұсынды.
Бұл – бүгіннің шешімі. Ал ертеңгі күннің қалай өрбитіні Алмас Өтешовтің өз қолында. Өткеннен сабақ алып, жаңа мүмкіндіктерді тиімді пайдалана білсе, Сыр өңірі өз талантты спортшысын ешқашан сыртқа теппейді.