Алматы қаласы өңірлік коммуникациялар қызметінде өткен пресс конференцияда Алмалы ауданының әкімі Арман Шамшин 2025 жылдың 5 айындағы әлеуметтік-экономикалық дамудың қорытындыларын ұсынды.
Оның айтуынша, ауданда кәсіпкерлік қарқынды дамып келеді, сонымен қатар санитарлық тазалық пен абаттандыру жұмыстары күшейтілген.
«Осы жылдың 5 айында Алмалы ауданынан мемлекеттік бюджетке 528 млрд теңгеден астам салық түсті. Оның шамамен 350 млрд теңгесі республикалық бюджетке, ал 180 млрд теңгеге жуығы жергілікті бюджетке бағытталды», - деді Арман Шамшин.
Сондай-ақ аудан экономикасына 79,7 млрд теңге инвестиция тартылған, оның 45 млрд теңгесі құрылыс саласына бағытталыпты.
«Жыл басынан бері шағын және орта бизнес субъектілерінің саны 4,9%-ға артты. Қазіргі таңда олардың саны 72 мыңнан асты, оның ішінде 38 мыңнан астамы - жеке кәсіпкерлер», - деп атап өтті аудан әкімі.
Есепті кезеңде өнеркәсіп өндірісінің көлемі шамамен 105 млрд теңгені, ішкі сауда көлемі – 1,8 трлн теңгені құрады. Ішкі сауда құрылымында:
- - бөлшек сауда айналымы – 381 млрд теңге (2024 ж. – 1 034,8 млрд теңге),
- - көтерме сауда – 1 403 млрд теңге (2024 ж. – 3 181,3 млрд теңге).
Әкім сонымен қатар аулалар, көшелер, саябақтар, скверлер мен қоғамдық кеңістіктерді санитарлық тазалау жұмыстары да көптеп жүргізіліп жатқанын айтты. Ұзындығы 186 шақырым болатын 110 көшені тазалау жұмыстарымен 3 мердігер ұйым айналысады, бұл жұмыстарға 241 жұмысшы және 162 арнаулы техника тартылған. Тұрғындардың шағымдарына жедел әрекет ету үшін 3 жедел топ құрылған.
Аудандағы 425 аула аумағын күтіп-ұстауға 5 мердігер ұйым, 325 жұмысшы және 45 техника жұмылдырылған.
48 жасыл аймақты - саябақтар, скверлер мен бульварларды 113 жұмысшы күтіп ұстап, 25 техника жұмысқа тартылған.
«Аулалар мен көшелерді, саябақтар мен қоғамдық кеңістіктерді тазарту - жайлы қалалық ортаны қалыптастырудың маңызды бөлігі. Биыл біз аулаларға арналған 9 бірлік арнайы техниканы сатып алуды жоспарлап отырмыз», - деп түйіндеді сөзін Арман Шамшин.