Алматыда Алғыс айту күніне орай концерт өтті
Абай атындағы Қазақ ұлттық опера және балет театрында «Алғысым саған, Қазақстан!» атты Алғыс айту күніне орай концерт өтті. Көктемнің алғашқы жаймашуақ күні Алатаудың баурайындағы әсем қала ән мен жырға бөленді.
Алматы қаласы мәдениет басқармасы ұйымдастырған іс-шараның жүргізушілері – Майя Веронская және Ильяс Ибраимов. Концертте көпұлтты артистер құрамы және эстрада жұлдыздары Отан, бірлік және ұлттық құндылықтар туралы әндерін орындады. Кеш шымылдығын «Рахмет саған, Туған Ел!» әні негізінде құрастырылған театрландырылған музыкалық қойылым ашты. Прологында Роман Ким, Muzart Life, «Жас сахна» театрының актерлері және балалар хоры өнер көрсетті. Сонымен қатар, Бүркіт пен Аиша, Бейбіт Қошқалиев, «Дервиши», «101», «Urker», «Ситора Назарова», «ОрыSTAR Show» және тағы да басқа топтар ән шырқап, көрерменнің көңілін көтерді. «Жас сахна» театры артистерінің қатысуымен мерекенің негізгі мағынасын ашатын «Бірлігіміз – байлығымыз» атты миниатюра ұсынылды.
Мерекелік концерттің соңында Бейбіт Қошкалиев «Елім деп соқсын жүрегің» атты әнін орындады.
Қазақстандағы Алғыс айту күні – Қазақстан халқының өзара көмегі мен бірлігінің бейнесі. Бұл күні Алматы қаласының тұрғындары мен қонақтары шығармашылық кештерді, концерттер мен театрландырылған қойылымдарды, мерекелік және мәдени іс-шараларды тамашалап, бір серпіліп қалды.
