Бұл күн – тарихтың күрделі кезеңдерін еңсерген елдің сабырын, сан түрлі тағдырды тоғыстырған даланың кеңдігін, халықтар арасындағы өзара құрмет пен сенімнің қадірін еске салатын рухани мереке.
Біз үшін бірлік – жай ұран емес, сан жылдық еңбектің, сабыр мен парасаттың жемісі. Қазақстан көпұлтты мемлекет ретінде сан алуан мәдениет пен дәстүрдің, тіл мен танымның тоғысқан мекені. Осындай ортада татулықты сақтап, ортақ мақсатқа жұмыла білу – халқымыздың ең үлкен жетістігі. Алғыс айту күні осы құндылықтардың маңызын терең сезінеміз.
Еліміздің қоғамдық келісім үлгісін қалыптастыру жолында аянбай еңбек еткен жандардың орны бөлек. Қазақстан халқы Ассамблеясының ардагерлері – сол игі істің бастауында тұрған абзал тұлғалар. Олар қоғамдық жұмыс атқарумен қатар, сенім мен түсіністіктің алтын көпірін сала білді. Қиын кезеңдерде байыппен шешім қабылдап, ел ішіндегі тұрақтылықты сақтауға өлшеусіз үлес қосты. Олардың парасаты мен жауапкершілігі бүгінгі бейбіт өміріміздің берік іргетасына айналды.
Бүгінде сол жауапты миссияны жалғастырып жүрген азаматтарға да айрықша алғыс айтамыз. Заманауи әлемдегі жаһандық өзгерістер, ақпараттық ағын мен әлеуметтік сынақтар жағдайында қоғамдық келісімді сақтау – оңай міндет емес. Дегенмен өз ісіне адал, ел болашағына бейжай қарамайтын жандардың қажырлы еңбегі арқасында мемлекет пен қоғам арасындағы сенім нығайып келеді. Ашық диалог, өзара құрмет пен жауапкершілік – тұрақты дамудың басты кепілі.
Мемлекет басшысы Қасым-Жомарт Тоқаев атап өткендей, отыз жыл ішінде Қазақстан халқы Ассамблеясы тарихи миссиясын абыроймен атқарып, қоғамдық келісім мен ұлттық бірліктің бірегей алаңына айналды. Бүгінде оның дамуының жаңа кезеңі басталды. Бұл – заманауи жұмыс форматтарына көшу, қоғамдық қатысуды кеңейту, сарапшылық және азаматтық әлеуетті арттыру кезеңі. Халық кеңесі форматын дамыту да қоғаммен кері байланысты нығайтуға бағытталған маңызды қадам.
Қоғамдық келісім – бір сәттік құбылыс емес, үздіксіз еңбекті қажет ететін үдеріс. Ол сенімнен, сыйластықтан, ортақ жауапкершіліктен бастау алады. Әр буын өткеннің өнегесін сақтап, жаңа заман талаптарына бейімделе алғанда ғана ел іргесі бекем болмақ. Сондықтан тарихи жадымызды құрметтеу, аға буынның еңбегін бағалау және жастардың белсенді қатысуына жол ашу – ортақ міндетіміз.
Алғыс айту – тек ризашылық білдіру емес, жүректегі ізгілікті ұлықтау. Егер алғыс күнделікті өмір салтымызға айналса, қоғамдағы сенім де нығая түсері сөзсіз. Әрбір шешіміміздің негізінде әділдік, ашықтық және өзара қолдау жатсын. Сонда ғана еліміздегі бейбітшілік пен келісім берік сақталып, болашағымыз жарқын болмақ.
Алғыс – бірліктің бастауы. Бірлік – мемлекетіміздің ең қымбат қазынасы.
Рафик МИРЗОЕВ,
«Барбанг» Қазақстан күрдтері қауымдастығы
Басқарма кеңесінің төрағасы.