Қарағандының 22 жастағы тұрғыны Threads әлеуметтік желісіндегі ұлтаралық араздықты қоздыруға қатысты іс бойынша қамауға алынды. Бұл туралы Қарағанды облыстық полиция департаменті мәлім етті, - деп хабарлайды Аqshamnews.kz.
Ведомствоның мәліметінше, әлеуметтік желілерді мониторингтеу барысында полиция қызметкерлері Threads желісінде Қарағанды тұрғынының жариялаған жазбасын анықтаған. Тексеру нәтижесінде бұл дерек бойынша ҚР Қылмыстық кодексінің 174-бабы 1-бөлігі (араздықты қоздыру) бойынша қылмыстық іс қозғалды.
Полиция департаменті мәліметінше, соталды тергеу барысында күдіктінің елден кетуге ниетті екені туралы ақпарат алынған.
"Күдікті уақытша ұстау изоляторына қамалды. Тергеу барысында 22 жастағы қарағандылық бойжеткен Threads әлеуметтік желісінде ұлтаралық араздық белгілері бар жазба жариялағаны анықталды. Тергеу органдарына оның елден шығуға дайындалып жатқаны туралы мәлімет жеткеннен кейін, оны қамауға алу туралы өтініш түсірілген", – деп хабарлады ведомстводан.
Қылмыстық кодекстің 174-бабына сәйкес, 2 000-нан 7 000 АЕК-ке дейін (7 863 000 – 27 524 000 теңге) айыппұл салу, не бостандығын шектеу, не екі жылдан жеті жылға дейін бас бостандығынан айыру жазасы қарастырылған.
22 шілдеде Қарағанды қаласының тергеу соты тергеу органының өтінішін қанағаттандырды. Тергеу аяқталғанға дейін күдікті екі ай мерзімге қамауға алынды. Қазір соталды тергеу жалғасып жатыр, қажетті сараптамалар тағайындалды. Тергеу қорытындысы бойынша процессуалдық шешім қабылданады.
Бұған дейін бойжеткеннің жазбалары әлеуметтік желіде қызу талқыланып, көптеген қолданушы оларды қорлайтын деп санаған. Кейін сыннан кейін бойжеткен видео жазып, жазбалары арқылы ренжігендердің барлығынан кешірім сұрады.