UAE SWAT Challenge халықаралық жарысында қазақстандық арнайы жасақтар жоғары дайындық деңгейін көрсетіп, әлемнің үздік командаларының қатарынан көрінді, – деп хабарлайды aqshamnews.kz тілшісі Қазақстан Республикасы Ұлттық ұланы ІІМ
«Оңтүстік» өңірлік қолбасшылығының баспасөз қызметіне сілтеме жасап.
Бұл беделді сайыста еліміздің арнайы жасақтары, соның ішінде «Томирис» әйелдер тобы да ерекше шеберлік танытып, жүлделі орындармен оралғаны белгілі.
Қазақстан құрамасының сапында Қазақстан Республикасы Ұлттық ұланының әскери қызметшілері де өнер көрсетті. Олардың қатарында майор Диас Ахметбаев пен прапорщик Ақыл Новаев бар.Жарыстан оралғаннан кейін аталған әскери қызметшілер Талдықорған қаласындағы Жақсылық Үшкемпіров атындағы облыстық мамандандырылған олимпиадалық резервтің мектеп-интернат-колледжінің оқушыларымен кездесу өткізді. Кездесу барысында әскери қызметшілер халықаралық жарыстың ерекшеліктері, қатысушыларға қойылатын талаптар және командалық дайындықтың маңызы туралы айтып берді.
Оқушылар тарапынан қойылған сұрақтар да аз болған жоқ. Жастар әскери қызметтің қыр-сыры, арнайы жасақтардың дайындығы және халықаралық жарыстарға қатысу тәжірибесі жөнінде қызығушылық танытты. Кездесу еркін форматта өтіп, әскери қызметшілер оқушылардың барлық сауалдарына жан-жақты жауап берді.
Майор Диас Ахметбаев жастарға арнаған сөзінде:
«Әлемдік деңгейдегі жарыстарда жеңіске жету – тек физикалық дайындықтың емес, тәртіптің, табандылықтың және командалық рухтың нәтижесі. Егер адам алдына мақсат қойып, соған жүйелі түрде еңбектенсе, кез келген биікті бағындыруға болады», – деп атап өтті.
Кездесу соңында оқушылар әскери қызметшілерге алғыс айтып, естелік суретке түсті. Мұндай тағылымды кездесулер жас ұрпақты патриоттық рухта тәрбиелеуге, сондай-ақ олардың ел қорғаны болуға деген қызығушылығын арттыруға ықпал ететіні сөзсіз.