Испанияның Мелилье қаласында өтіп жатқан 2024 жылғы командалық чемпионатында қызықты оқиға орын алды. 22 жастағы Кирилл Шевченко, C.A. Silla - Integrant Col·lectius командасының мүшесі, чемпионатқа қатысушылар қатарынан шығарылды., деп хабарлайды aqshamnews.kz.
Ал оның бірінші және екінші турдағы жеңістері мен тең ойындары жеңіліс деп саналды. Оған алаяқтықпен айналысқаны туралы айып тағылды.
Бұл шешімді шараның бас судьясы Оскар Бруно де Прадо Родригес қабылдады. Ол Шевченконың әділетсіздік жасағанына қатысты ешқандай күмән қалмағанын мәлімдеді.
Тексеру барысында шахматшының ойын барысында жиі дәретханаға кетіп қалғаны, бірақ арбитрлерге алдын ала хабарламағаны анықталды. Кешкісін едент жуушы дәретханадан телефон тауып алып, чемпионат өтіп жатқан қонақүйдің әкімшілігіне берген. Келесі күні сол дәретханада тағы да телефон табылды, ал Шевченко дәл осы кабинкаға жиі кірген.
Судьяның сұрауы бойынша шахматшының дәретханаға жеке кетуіне бақылау орнатылды. Ұйымдастырушылар Шевченконың телефон табылғаннан кейін де дәретханаға кіріп, әлгі кабинканың есігі жабық болса, басқаларына кірмей соны ашылғанын күтетінін байқаған.
«Тексеру барысында жиналған дәлелдерге сүйене отырып, мен осы шахматшының ойын барысында мобильді телефон қолданғанына толық сенімдімін. Сондай-ақ, ол ойын залын тастап кеткенде маған хабарлауды немесе сұрануды орындамады. Бұл ФИДЕ ережелерін бұзуды білдіреді», — деді чемпионаттың бас судьясы Chess.com сайтына берген сұхбатында.
Оқиға туралы есеп, барлық дәлелдермен бірге Испания шахмат федерациясының (FEDA) судьялық комитетіне және ФИДЕ этикалық комиссиясына жіберілді.
Кирилл Шевченко — 22 жастағы шахматшы. Украинада туған, 2023 жылдан бері Румыния үшін ойнап жүр. Ол әлемдік рейтингте 69-орында, 14 жасында гроссмейстер атанған.