4–5 қазанда Республика сарайының алдындағы Абай алаңында Алматы туризм басқармасының қолдауымен халықаралық ALA CRAFT 2025 қолөнер фестивалі өтеді.
Іс-шараға Қазақстаннан және шетелден келген 100-ден астам шебер қатысып, дәстүрлі және заманауи қолөнер туындыларының үздік үлгілерін ұсынады, деп хабарлайды Aqshamnews.kz.
Қонақтарды авторлық бұйымдар жәрмеңкесі, ашық шеберлік дәрістері және «Шебер» республикалық байқауының үздік жұмыстарының көрмесі күтеді. Байқаудың жүлде қоры серіктес Chevron компаниясының қолдауымен қамтамасыз етілген. Жеңімпаздар шетелде білім алып, басқа елдердің әріптестерімен тәжірибе алмасуға мүмкіндік алады.
Фестивальдің басты оқиғаларының бірі – Алматыға Дүниежүзілік қолөнершілер кеңесінің (World Craft Council) шешімімен «Әлемдік қолөнершілер қаласы» мәртебесінің ресми түрде берілуі. Бұл қаланың бай қолөнер дәстүрі мен өңірдің креативті экономикасын дамытуға қосқан үлесінің халықаралық деңгейде мойындалуы.
Зергерлер Серікқали Көкенов, Серік Рыспеков, Сержан Баширов, музыкалық аспап шебері Жолаушы Тұрдығұлов, сондай-ақ этно-дизайнерлер Айжан Бекқұлова, Тілек Сұлтан, Әуес Сағынаева және Айдархан Қалиев жетекшілік ететін Aspara бренді сынды белгілі қазақстандық шеберлер бұйымдарын таныстырады.
Шетелдік қонақтардың қатарында WCC Азия-Тынық мұхиты аймағының президенті Джуд ван дер Мерве (Австралия), вице-президент Лейла Уолтер (Жаңа Зеландия), кеңесші Азиз Муртазаев (Өзбекстан), сондай-ақ Smithsonian Center for Folklife and Cultural Heritage (АҚШ) делегациясы бар.