Назым Қызайбайдың спорттағы жетістіктері – қазіргі заманғы спорт пен қоғам үшін маңызды көрініс. Оның жастарға үлгі болып, қажырлы еңбек, темірдей тәртіптің арқасында мақсатқа жетуге болатынын дәлелдейді. Назымның жеңістерінің артында күнделікті жаттығу мен үлкен жігер жатыр. Бұл қасиеттер кез келген жас спортшы үшін үлгі болып табылады.
Бүгін №110 мектеп-гимназиясында ел спортының абыройын асқақтатып жүрген, қазақ боксының мақтанышы, әлемнің бірнеше дүркін чемпионы Назым Қызайбаймен жүздесу өтті. Чемпионның келуі білім ордамыз үшін мәртебе, оқушылар үшін нағыз рухани серпіліс болды. Залға жиналған жас жеткіншектердің көзіндегі жалын мен қызығушылық – чемпионмен кездесудің құндылығын айқын көрсетті.
Кездесу барысында Назым Қызайбайдың спорт әлеміндегі жолын баяндайтын таныстыру видеосы көрсетілді. Белді спортшының рингтегі ерлігі, әлемдік додалардағы жеңісі оқушыларға ерекше әсер қалдырды. Шараның ашылу салтанатын «Кәусар» домбырашылар ансамблі керемет күймен бастады. Домбыраның киесін сездірген бұл әсерлі сәт рухты күйімен залда отырғандарды бірден баурап алды. Шараны одан әрі көркемдеген – мектебіміздің мың бұралған «Самал би» тобы шараның сәнін келтіріп, өз өнерлерін тарту етті.
Кездесу сұхбат алаңына ұласып, оқушылар өз сауалдарын жолдап, өздерін қызықтырған сұрақтарын қойып, чемпионның балалық шағы, спортқа келуі, алғашқы жеңістері туралы тың мәліметтер алды. Спортшы әр сұраққа шынайы жауап беріп, табысының сыры еңбекте, төзімде, мақсаттан таймауда екенін айтты.
Кездесу соңында чемпион өзінің балалық шағы Айнабұлақ шағын ауданында өткенін, осы өңірдің жүрегіне жақын екенін тебірене айтты.
"Өскен жерім – мен үшін ерекше сезім. Бұл жерде армандар басталып, мақсаттар қалыптасты. Бүгінгі жүздесуден өзім де қуат алдым», – деген сөздері залды жылы сезімге бөледі. Әрбір жауаптың өзегі – еңбек, табандылық және Отанға деген сүйіспеншілік. Назым Қызайбай жас спортшыларды намысқой, қайсар, арманшыл болуға шақырды. Бұл кездесу жас буынға тек ақпарат емес – жігер, сенім, биікке ұмтылу рухын сыйлап, болашақ чемпиондардың жүрегінде от тұтатып, жас буынға үлгі болып үлкен арманға жетелеріне сеніміміз мол."
Әлемді мойындатқан үш дүркін чемпион Назым Қызайбайдың Айнабұлақтай шағын ауданда балалық шағы өтіп, тұрғындардың ыстық ықыласынан қуат алған спортшы бүгінгі жеңістерін өз еліне, туған жеріне арнайтынын әр сөзінде айтып тоқталды. Айнабұлақ – оның алғашқы қадамы, алғашқы арманымен ұштасқан қасиетті мекені. Сондықтан Назым Қызайбайдың әлемдік деңгейге дейін жету жолы – осы топырақтан түлеп ұшқан әрбір жасқа жігер беретін жарқын үлгі. Қорыта келгенде, бір ғана спортшының өмір жолы – тұтас бір буынға үлгі, ұлт рухын көтеретін құндылық екені тағы да дәлелденді.
Өр рухты Назым Қызайбай сынды тұлғалардың өмір жолы – ұрпаққа өнеге, елге мақтаныш.