Депутат Асхат Аймағамбетов мұғалімдерге қатысты маңызды жаңалықты бөлісті, - деп хабарлайды Aqshamnews.kz.
Оның айтуынша, педагогтардың құқықтарын қорғауға бағытталған жаңа заң жобасы әзірленіп, Үкіметке жолданды.
Жаңа құжатта педагогтардың кәсіби міндетіне жатпайтын жұмыстардан босатылуы нақты қарастырылған.
"Мұғалімнің басты жұмысы – білім беру. Ол мобилограф, блогер, күзетші немесе чат модераторы болмауы керек", – деп атап өтті депутат.
Негізгі өзгерістер қандай?
Артық есепке – тоқтам. Қағаз немесе цифрлық есептің тек бір түрі ғана толтырылады. Бір жүйеге енгізілген мәлімет бірнеше платформаларда қайталанбауы тиіс.
Мұғалім блогер болуға міндетті емес. Пост жазу немесе әлеуметтік желі жүргізу – тек мұғалімнің еркімен.
Чаттар мен хабарламаларға шектеу. Хабар алмасу тек ресми LMS платформалар мен электронды пошта арқылы жүргізілуі тиіс. Мұғалім тәулік бойы чатта отырмайды.
Мектептен тыс жағдайға мұғалім жауап бермейді. Ол күзетші де, тергеуші де емес.
"Мұғалімге тән емес функциялар" ұғымы заңмен бекітіледі. Яғни еңбек келісімшартында көрсетілмеген міндеттерді жүктеуге тыйым салынады.
Ата-ана мен мектеп арасындағы келісімнің мәртебесі артады. Барлық тараптар тәрбие ісінде ортақ жауапкершілік алуы тиіс.
Мұғалім мәртебесін бұзғандарға айыппұл күшейеді.
Физикалық және психологиялық зорлыққа – нөлдік төзім. Заң жобасында педагогқа қысым көрсетуге мүлдем тыйым салынатын арнайы норма енгізілген.
Асхат Аймағамбетов бұл бастаманың мұғалім мәртебесін арттыруға және білім беру саласындағы әділеттілікті нығайтуға бағытталғанын атап өтті.
