Қазақстанның тұңғыш президентінің баспасөз хатшысы Айдос Үкібай кейінгі күндері тараған жалған ақпараттарға байланысты мәлімдеме жасады, деп хабарлайды Aqshamnews.kz тілшісі.
Үкібайдың айтуынша, кейбір БАҚ пен әлеуметтік желілерде Сара Алпысқызы Назарбаеваның денсаулық жағдайы мен орналасқан жеріне қатысты шындыққа жанаспайтын мәліметтер тараған. Ол Сара Назарбаеваның сәуір айынан бері Алматыдағы ҚР Президенті Іс басқармасы Медициналық орталығының Ұлттық госпиталінде ем қабылдап жатқанын, барлық медициналық шаралардың бекітілген стандарттарға сай әрі отандық мамандардың бақылауымен жүргізіліп жатқанын жеткізді.
Баспасөз хатшысы жұртшылықты тек ресми дереккөздерге жүгінуге, сондай-ақ Сара Алпысқызының есімін расталмаған ақпарат пен алыпқашпа әңгімелер арқылы назар аударту үшін пайдаланбауға шақырды.
Еске салайық, 5 мамырда әлеуметтік желілер мен бірқатар БАҚ-та Сара Назарбаеваның ауыр жағдайда жатқаны туралы хабар тараған еді. Сол уақытта да Медициналық орталық оның госпитальде ем алып жатқанын растап, денсаулық жағдайына қатысты ақпараттың құпия екенін мәлімдеген болатын.
