Азаматтық қоғам құру жолындағы қарымды да арынды қадам деп білемін.
Қазақстанның Ақпарат және қоғамдық даму министрі Аида Балаева Қазақстан Президенті Қасым-Жомарт Тоқаев бүгінгі халыққа арнаған үшінші Жолдауында да елімізде жүргізіліп жатқан саяси жаңғыру реформаларын жүйелі жалғастырудың маңыздылығына ерекше мән бергенін атап өтті, деп хабарлайды Almaty-akshamy.kz.
Министрдің пікірінше, Қазақстан Тәуелсіздігін алғаш жарияланғаннан бастап мемлекеттегі ішкі саяси тұрақтылық мен этносаралық татулық қағидалары осы мемлекеттік саясаттың басты ұстанымы болып келген.
«Осының арқасында егемен еліміз 30 жылдағы жаһандық дамуда жоталы жетістіктер мен бедерлі биіктерді тұрақты бағындырып келеді. Дегенмен, жетістікке жету бар да, оны сол деңгейде ұстап тұру бар. Бұл тек билік пен халық арасында сауатты да сындарлы байланыс орната алған қоғамда ғана бұл мүмкін болады. Сондықтан да мемлекет әлеуметпен арадағы осы диалогты сақтап қана қоймай, өзара сенім деңгейін түсірмей оны ары қарай нығайта жетілдіру үшін үнемі қажетті шараларды қабылдап келеді. Оның жарқын бір мысалы – құрылғаннан бері іс-әрекетімен сенім үдесінен шыға білген Президент жанындағы Ұлттық қоғамдық келісім кеңесі. Бүгінгі күні бұл тек консультативті Кеңес ресурсы ғана емес, мол интелектуалды мүмкіндігі бар тиімді әрі әлеуетті құрылым. Мемлекет Басшысының алдыңғы Жолдауларында айтылған реформаларды нәтижелі де толыққанды іске асуына тың серпін беретін күшке айналды. Президент бүгінгі халыққа арнаған үшінші Жолдауында да елімізде жүргізіліп жатқан саяси жаңғыру реформаларын жүйелі жалғастырудың маңыздылығына ерекше мән берді», – деп жазған Аида Балаева өз Facebook парақшасында.
Бұл ретте министр Мемлекет басшысының Ұлттық Кеңес мінберінде көтерген бастамалары негізінде сәтті іске асқан саяси реформалар пакетін атап өткен.
«Қоғамда қордаланған көптеген маңызды қоғамдық-саяси және әлеуметтік-құқықтық мәселелер өз шешімін тапты. Мысалы, аудандық деңгейлегі қалалар мен ауыл әкімдерін сайлау реформасы соның айқын да жарқын дәлелі бола алады. Еліміздің 14 өңірінде құрылған 1 847 сайлау учаскелерінде өткен аталған сайлауда 2 297 үміткердің ішінен ел тұрғындары 730 жергілікті әкімді сайлап алды. Соның ішінде, олардың 627-сі «Ауыл», «Ақ жол», ХКП, АDAL сынды саяси партиялар ұсынған үміткерлерден таңдалды. Мұның өзі, Мемлекет басшысының бастамасымен қолға алынған реформалардың саяси партиялар мен азаматтық қоғам алаңындағы белсенділікті одан ары жандандыруға тың серпін бергенін көрсетеді», – деп ойлады министр.
Оның пікірінше, сондықтан да Президент бұл бағытта қолға алынған шаралардың дұрыстығына кезекті рет тоқталып, 2024 жылы тұрғындарға аудан әкімдерін сайлауға мүмкіндік берілетінін атап өтті.
«Мұнымен қатар, Мемлекет басшысы, жергілікті өзін-өзі басқаруды жетілдіру ісінде ауылдық жерлердегі азаматтық бастамаларға қолдау көрсетудің маңыздылығына назар аударып, гранттық қаржыландыру жүйесін бейімдеудің тиімді тетігін әзірлеуді тапсырды. Сөз жоқ, аталған шаралардың барлығы да саяси сауатты, демократиялық түсінігі пісіп-жетілген, әлеуметтік белсенділігі жоғары азаматтық қоғам құру жолындағы қарымды да арынды қадам деп білемін»,– деп жазды Аида Балаева.