Қымбат Ілиясова, Үлкен ауылының тұрғыны:
АЭС тек энергия көзі емес, ол – ауылымызды қайта жандандырудың жолы Үлкен ауылының басты мәселелерін осы жерде тұратын халықтан артық ешкім білмейді. Атом электр станциясын саламыз деген жаңалықты естігеннен бері ауыл тұрғындары бұл бастаманы қолдап, станция құрылысы тезірек басталса екен деп күтіп отыр. Себебі, АЭС салу тек Үлкеннің ғана емес, бүкіл елдің энергетикалық тәуелсіздігіне жол ашады деп сенеміз. Энергия тапшылығы жылдан жылға артып келеді, ал атом энергетикасы осы мәселені шешудің ең тиімді жолдарының бірі болмақ.
Қазір әлем бойынша 27 мемлекет АЭС салуды жоспарлап отыр, оның ішінде 17 мемлекет нақты шешім қабылдады. Соның ішінде Қазақстанның да болуы бізді қуантады. Бұл біздің болашағымызға жасалған үлкен қадам. Өйткені, АЭС тек энергия көзі ғана емес, елдің экономикалық және өнеркәсіптік дамуына да зор ықпал етеді.
АЭС тек энергия көзі емес, ол – ауылымызды қайта жандандырудың жолы. Ауылда жұмыс жоқ, жастар үлкен қалаларға кетіп жатыр. Ал АЭС салынатын болса, Үлкен ауылы қайта жанданып, тұрғындар тұрақтайды. Біз болашағымызды осы жобамен байланыстырамыз, себебі ауылымызға тұрақтылық пен даму қажет. Ауыл тұрғындары Үлкеннің болашағы үшін атом электр станциясы сияқты ірі жобалардың маңызы зор екендігін түсінеді және бұл бастаманы бірауыздан қолдап отыр.