Сенат депутаттары, атом электр стансасын салу жөніндегі халықтық штаб мүшелері Әлібек Нәутиев пен Сағындық Лұқпанов Атырау облысы, Махамбет ауданына сапармен барды. Олар Бейбарыс ауылында білім саласының қызметкерлерімен кездесіп, атом электр стансасының құрылысы мен оның облыс және ел үшін маңыздылығын түсіндіруге баса назар аударды.
Сенаторлар АЭС құрылысының Қазақстанның энергетика саласының тұрақты дамуына ғана емес, елдің энергетикалық тәуелсіздігін нығайтуға және экономикаға оң әсер ететініне тоқталды. Сонымен қатар, атом электр стансасы экологиялық таза энергияның сенімді көзі ретінде маңызды рөл атқаратынын атап өтті.
Депутаттар әлемнің жаңартылатын және экологиялық таза энергия көздеріне көбірек көшіп жатқанын, ал атом энергетикасы осы ауысулардың негізгі құрамдас бөлігі екенін айтты. Олар АЭС көміртекті энергия көздеріне тәуелділікті азайту арқылы қоршаған ортаға тигізетін оң әсерін егжей-тегжейлі түсіндірді.
Сондай-ақ, Парламент депутаттары Мемлекет басшысының қыркүйектегі Жолдауында айтылған негізгі мақсаттар мен міндеттерге тоқталып, олардың энергетика саласына тікелей қатысы бар екенін түсіндірді. Мемлекет басшысының ұсынған даму бағыттары әрбір саланы, соның ішінде энергетикалық секторды жаңа деңгейге көтеруге бағытталғаны айтылды.
Депутаттар кездесу барысында қатысушылардың биылғы қазан айында өтетін референдум туралы сұрақтарына жауап беріп, еліміздің энергетикалық стратегиясының болашағы азаматтардың шешіміне байланысты болатынын атап өтті. Олар тұрғындарды референдумға белсенді қатысып, өз дауыстарын беруге шақырды.