Жаңа Салық кодексі ірі компаниялардың жеңілдетілген салық режимін пайдалануға тосқауыл қояды. Бұған дейін талдау көрсеткендей, триллиондап айналым жасайтын ірі кәсіпорындар жеңілдетілген режим арқылы салықтан жалтарған.
Енді ереже айқын:
-шағын бизнес (дүкендер, дәріханалар, кафелер, тасымал және қызмет көрсету) – жеңілдетілген режимде қалады;
-ірі бизнес (құрылыс, телекоммуникация, жер қойнауын пайдалану, көтерме сауда) – жалпыға бірдей режимге өтеді.
Бұл шешім бәсекені әділ етеді: шағын кәсіпкерлер тыныш әрі ашық жұмыс істейді, ал ірі компаниялар толыққанды салық жүйесімен жұмыс жасайды.
Әлеуметтік басымдықтар
Мемлекет әлеуметтік маңызы бар салаларға ерекше көңіл бөлді. Жеңілдетілген режимде қалады:
-білім беру мен медицина (балабақшалар, стоматология, үйірмелер мен спорт секциялары);
-ауыл шаруашылығы (жеңілдетілген жер салығы, ҚҚС бойынша жеңілдіктер, сауда желілеріне тікелей жеткізу мүмкіндігі);
-креативті индустрия (кино, музыка, фото, дизайн).
Ал өңдеуші өнеркәсіп үшін арнайы қолдау қарастырылған: ҚҚС бойынша жеңілдіктер, инвестициялық шегерімдер, «Бәйтерек» пен «Даму» арқылы жеңілдетілген қаржыландыру.
Яғни, шағын бизнес бұрынғыдай жеңілдетілген режимде жұмыс істейді, ірі бизнес толық салық төлейді, ал халық тауарлар мен қызметтерді қолжетімді бағамен ала береді.