ТЮРКСОЙ ұйымының 30 жылдық мерейтойы өтті.
Мерейтойлық шаралардың қорытынды салтанатында түркі дүниесінің әдебиеті мен өнеріне қосқан зор үлесі үшін Бибігүл Төлегенова, Олжас Сүлейменов және Мұрат Әуез ТЮРКСОЙ ұйымының ең биік марапаты - ONUR NISANI - ҚҰРМЕТ БЕЛГІСІ - алтын медалімен марапатталды, деп хабарлайды Almaty-akshamy.kz
«Біріккен де, бөлінген де заман өтті. Тоқ болған да, жоқ болуға таяған да дәуірлер өтті. Өтті, бірақ әлі кете қойған жоқ. Қауіп қашанда қабырға сыртында» - деді Мұрат Әуез ТЮРКСОЙ ұйымының 30 жылдық мерейтойы аясында өтіп жатқан кітап көрмесінің ашылу салтанатында.
Күні кеше ғана солтүстік көршіміздің өзімен бауырлас халықтың жұртын жер бетінен жоқ қылып жіберу жолындағы ақылға сыймайтын арпалысының куәсі болып отырмыз. Қаншама халық қырылды, қаңғып, босып кетті, әлі де қаншама боздақтың соры, адамзаттың азабы тұрғаны белгісіз.
Қанша жерден беті аулақ дегенімізбен, қауіп, міне, көз алдымызда, шынымен де қабырғамыздың сыртында ғана тұр.
Қай заманда да халықтың еңсесін көтеріп, жанын жадыратып, көңіліне қуаныш, жүрегіне рух берген - өнер, білім, мәдениет және соны жасаушы зиялы қауым. Теңіздің тамшысындай ғана болып көрінетін жазылған еңбек, салынған сурет, жасалған туынды біріге-бірлесе келе көзі қарақты оқырман мен көрерменді яки қарапайым халықты өзінің айналасына жинары хақ.
Міне, соның нәтижесі ретінде соңғы күндері Алматы қаласында түрік халықтарының залқар зиялылары бас қосып, береке-бірлік салтанатын бірге атқарды.