Сейітқазы Матаев 70 жасқа толды.
Бүгін Қазақстанның медиа саласындағы беделді тұлға, елдегі сөз бостандығы мен журналистиканың дамуына орасан үлес қосқан көрнекті қайраткер Сейітқазы Матаев 70 жасқа толып отыр, деп хабарлайды aqshamnews.kz
Журналистер Одағының төрағасы, әріптестері мен ізбасарлары үшін ақылшы, журналистика саласындағы сарабдал маман – Матаев мырзаның өмір жолы еліміздің журналистика тарихында ерекше із қалдырды.
Сейітқазы Матаев өзінің еңбек жолын Қазақ телеграф агенттігінде (ҚазТАГ) меншікті тілші болып бастады, сондай-ақ «Известия» газетінің Қазақстан бойынша меншікті тілшісі, тәуелсіз Қазақстан тарихындағы тұңғыш Президенттің тұңғыш баспасөз хатшысы болды.
2001 жылдан бері Сейітқазы Матаев Қазақстан Журналистер Одағын басқарып келеді. 65 жыл бұрын құрылған бұл ұйым елдегі журналистиканың дамуына зор үлес қосты. Матаевтың әріптестері оның адалдығын ерекше тебіреніспен айтады, себебі бұл қасиет оның кәсіби және жеке өмірінің кредосына айналған.
Ол Қазақстандағы сөз бостандығын дамытуға үлкен үлес қосты. БАҚ өкілдерінің құқықтары мен мүдделерін қорғауда, сондай-ақ заң алдындағы ашықтықты сақтау мәселелерінде де алдыңғы қатардан табылды.
Журналистика – тек мамандық қана емес, ол ар-намысты, шындық пен әділдікті қорғау құралы. Оның өмір жолы мен қызметі адалдық, жауапкершілік, шынайылық қағидаттарына негізделді.
Сейітқазы Матаев көптеген тарихи оқиғалардың куәсі болды.
«Журналист қарапайым халықтың пікіріне, көзқарасына құрметпен қарауы тиіс», - деп санайды Журналистер Одағының төрағасы.
Сейітқазы Матаевтың барлық жетістіктері мен қиындықтарында жанында сүйікті жары Баян Рамазанова бірге болды. Ол ұзақ жыл радио саласында қызмет етті. Студенттік жылдары басталған жұптың махаббаты жарасымды жанұялық өмірдің 46 жылына жалғасып келеді. Өнегелі отбасы үш ұл тәрбиелеп өсірді, олар да ата-анасының ізін қуып, журналистика жолын жалғастырып келеді.
Сейітқазы Матаевтың өмір жолы – журналистиканың құндылықтары мен әділдікке деген сенімнің символы.
Еңбегіңіз жана берсін, Сейітқазы аға! Мерейтойыңызбен құттықтаймыз!