ҚР Президенті Қасым-Жомарт Тоқаев Маңғыстау жұртшылығымен кездесті.
Кездесуде облыста түйе және асыл тұқымжы жылқы өсіру туралы сөз қозғады, деп хабарлайды Almaty-akshamy.kz ҚазАқпаратқа сілтеме жасап.
Маңғыстаудың табиғаты түйе өсіруге өте қолайлы екені белгілі. Қазір облыста 90 мыңға жуық түйе бар. Бұл деректі Президент Қасым-Жомарт Тоқаев айтты, деп хабарлайды ҚазАқпарат.
«Түйе өнімдеріне бүкіл елімізде сұраныс өте жоғары. Одан алынатын шикізатты терең өңдеу жұмысын қолға алу қажет. Бұл өнімнің түрін көбейтеді әрі оның бағасына оң ықпал етеді. Үкіметке түйе шаруашылығын қолдауға арналған мемлекеттік шараларды күшейту мәселесін пысықтауды тапсырамын. Бұл салаға субсидия беру жолдарын да қарастыру керек», - деді Мемлекет басшысы.
Ол халқымыз үшін жылқының орны қашанда ерекше екеніне тоқталды. Қазақ Адай жылқысын Маңғыстаудың бірегей байлығы деуге болады. Бұл арғымақтар шөлге ерекше шыдамды, алыс жолға төзімді екенін бәрі біледі.
«Маңғыстау тұлпарлары алысқа шабатын халықаралық марафон жарыстарында әрдайым бәйге алып жүр.
Жақында өткен «Ұлы дала жорығында» облыс шабандоздары жеке-дара озып келді. Қазақ Адай жылқысын әлемге таныта алсақ, бұл біздің тағы бір тамаша брендімізге айналады. Сондықтан, Үкіметке оны ғылыми түрде асыл тұқымды мал ретінде тану және көбейту үшін тиісті жұмыстарды жедел қолға алуды тапсырамын», - деді Мемлекет басшысы.