Полиция Абай облысының тұрғындарын орманда жоғалған ер адамды іздеуге көмектесуге шақырды, - деп хабарлайды Aqshamnews.kz тілшісі.
Полицияның мәліметінше, 25 шілдеде Ардақ Байдүйсен орман алқабына кеткеннен кейін оралмаған. Қазір оны іздеу жұмыстары барлық аумақта жүргізіліп жатыр. Облыс тұрғындарынан іздеу жұмыстарына көмектесу сұралды.
Ресми деректерге сәйкес, 2025 жылғы 27 шілдеде полицияға жоғалған ер адамның әйелі хабарласқан. Ол 1968 жылы туған Ардақ Байдүйсеннің жоғалғанын мәлімдеген.
"25 шілдеде ол Кіші Ақтөбе аумағындағы орманға кеткен, содан бері оның қайда екені белгісіз. Қазір полиция қызметкерлері жедел-іздестіру шараларын белсенді түрде жүргізіп жатыр. Ертеңнен бастап іздеуге Ұлттық ұлан сарбаздары тартылады", – деп хабарлады Абай облыстық полиция департаментінің баспасөз қызметі.
Орман алқабының аумағы өте үлкен болғандықтан, Абай облысының тұрғындарынан жоғалған адамды іздеуге атсалысу сұралып жатыр.
"Бізге сіздердің көмектеріңіз қажет. 31 шілдеде еріктілер жиналады. Жиналу орны – Кіші Ақтөбе аумағы. Бейжай қарамайтын барлық азаматты іздеу жұмыстарына қатысуға шақырамыз", – деді полиция департаментінің баспасөз қызметі.
Жиналу уақыты мен нақты орны қосымша хабарланатын болады.