Құрманғазы атындағы қазақ ұлттық халық аспаптар оркестрінің мерейтойлық 90-шы маусымы кең көлемде аталып өтпек. Ұлттық домбыра күні мен халық композиторы Құрманғазы Сағырбайұлының 205 жылдығы қарсаңында оркестр бірқатар ауқымды қойылымдар жоспарлауда, деп хабарлайды almaty-akshamy.kz
Оркестрдің репертуары туралы Өңірлік коммуникациялар қызметінің брифингінде Құрманғазы атындағы қазақ ұлттық халық аспаптар оркестрінің директоры Медет Қуанышев пен бас дирижер Абылай Тілепберген айтып берді.
«Биылғы жылды біз Құрманғазы Сағырбайұлының 205 жылдығын мерекелеуден бастадық. Ұлттық және әлемдік классика туындылары, сондай-ақ музыка шебері, халық композиторы Құрманғазының үздік туындылары орындалған ауқымды концерт ұйымдастырылды. Әрбір ұйымдастырылған іс-шара Құрманғазы Сағырбайұлының 205 жылдығы мен ұлттық оркестрдің 90 жылдығын мерекелеу аясында өтуде», - деді М.Қуанышев.
Осы концерттік маусымды шығармашылық ұжым Италия қалалары бойынша «Көшпенділер әуені» (Көшпенділер әуені) атты гастрольдік тур барысында ашқанын атап өткен жөн.
«Біз 90-шы маусымды Римдегі (Италия) халықаралық гастрольдік концертімізбен аштық. Римнен басқа біз Неаполь мен Флоренция қалаларына бардық. Жергілікті көрермендер қазақ музыкасының ерекше дәміне тәнті болып, жылы лебіздері мен құттықтауларын білдірді», - деп толықтырды спикер.
Ұлттық домбыра күнінде (биыл 2 шілдеде атап өтіледі) оркестр республика астанасында ұйымдастырылатын іс-шараларға қатысады. Оркестр ұжымындағылар екі мерейтойды ескере отырып, арнайы қойылымдар дайындалатынын атап өтті.
«Биыл Домбыра күніне арналған концерттік бағдарлама Құрманғазы атындағы оркестр мен Н.Тілендиев атындағы «Отырар сазы» академиялық оркестрінің қатысуымен өтеді. Көрермендер елімізде танымал дирижерлердің жетекшілігімен танымал әртістердің, соның ішінде Айтқали Жайымов, Дінзухра Тілендиева, Руслан Баймурзин және басқалардың өнерлерін тамашалай алады. Бағдарламаның басты ерекшеліктернінің бірі - солақай домбырашылардың өнер көрсетуі болады, өйткені әдетте бұл аспапта оң қолмен ойнайды. Сондай - ақ, Халық әртістері Секен Тұрысбеков, Ерлан Рысқали және Айгүл Қосанова өнер көрсетеді деп күтілуде», - деді оркестрдің бас дирижері Абылай Тілепберген.
Сонымен қатар, шығармашылық ұжым алғашқы ұлттық оркестрдің тарихын баяндайтын бірқатар бейнематериалдар мен кітап шығаруға ниетті.
«Біз оркестрдің ғасырлық тарихын әртүрлі бейнематериалдарда, кітап басылымдарында түсіріп, оркестрдің бүгінгі күнге дейінгі даму тарихы жайлы айтып бергіміз келеді. Бастауында тұрған музыканттармен, дирижерлермен таныстырсақ дейміз. Қазіргі уақытта біз мұрағаттық материалдармен жұмыс істеп жатырмыз. Концерттік өмірден бос уақытты осы жұмысқа арнаймыз», - деді А. Тілепберген.
Құрманғазы атындағы Қазақ ұлттық халық аспаптар оркестрін 1934 жылы академик Ахмет Жұбанов құрды. Ұжымда бүгінде 90-ға жуық музыкант бар, олардың репертуарында 4000 туынды бар.