Арал кемпинг, мал өсіру немесе экожүйені қалпына келтіру үшін өте қолайлы.
Шотландияда Алматыдан пәтер алатын бағаға арал сатылып жатыр, деп хабарлайды aqshamnews.kz
The Spaces басылымының мәліметінше, Эйлеан Лох Оскэр аралы 125 мың фунт стерлингке (шамамен 83 миллион теңге) сатылымға шықты.
Бұл шамамен 10 акр жер учаскесі Лисмор аралының солтүстік-батысында, Шотландияның батыс жағалауындағы ең таза аймақтардың бірі – Лорн бұғазының суларында орналасқан. Эйлеан Лох Оскэр аралы "өзіндік оңашалық бұрышын құруға арналған бірегей мүмкіндік" ретінде жарнамаланып жатыр. Арал кемпинг, мал өсіру немесе экожүйені қалпына келтіру үшін өте қолайлы. Мұнда өзен суының көзі және шамамен бір шақырымдық жағалау сызығы бар.
Шотландияның тіркелген мүлік құқығына (ерекше жер иелену түрі) сәйкес, аралға күтім мен мақсатты пайдалану қажет. Болашақ иесі аралда тұруы немесе одан 32 шақырымнан алыс емес жерде орналасуы керек. Жерді пайдалану ауыл шаруашылығымен айналысуды немесе табиғатты қалпына келтіру жұмыстарын қамтуы мүмкін.
Аралдың тартымдылығына қарамастан, сатып алушылар оның пайдалану шектеулерін ескеруі керек. Жергілікті билік туризмді дамыту жоспарларын және биік жерге автономды тұрғын үй салу жобасын бұрыннан-ақ мақұлдамаған.