Қазақстан аумағын жаяу бағындыруға бел буған марафоншы Меккеге жаяу баруды армандайды.
72 жастағы марафоншы Сәрсенбай Қотырашов елордаға жетті. Еліміздің бас қаласы – марафон кезінде қария аялдаған 13-ші өңір. Ақсақал туған жері Қарағанды облысындағы Ұлытау ауылынан жолға шыққан, деп хабарлайды Almaty-akshamy.kz.
Қазір күніне 40 шақырымды артта тастайды. Алыс сапарға шықпастан бұрын зейнеткер марафонға түпкілікті дайындалған. Ол күн сайын 100 шақырымға дейін жүріп өткен.
«Алдағы мақсат - Меккеге жаяу барсам деген арманым бар. Одан кейін Алла қуат берсе жер шарын аралап шығып, халқымның бар екенін, ұлтымның бар екенін дүниеге танытсам деймін», - дейді саяхатшы Сәрсенбай Қотырашов.
Осы уақыт ішінде жиһанкез он жұп аяқ киімді тоздырып үлгерген. Жалпы, қараша айына дейін марафоншы Қазақстанның 18 қаласын жаяу аралауды көздеп отыр. Жүрген жерінде Ұлытау тарихын таныстыра отырып, Наурыз мерекесін кеңінен насихаттауды, сондай-ақ әр өңірдегі қолөнер шеберлері туралы тың деректерді де жинақтауды мақсат еткен.