Өткен түнде Жетісу және Қостанай облыстарында құтқарушылар қар құрсауында қалған 63 адамды құтқарды, деп хабарлайды aqshamnews.kz ҚР ТЖМ-іне сілтеме жасап.
Жетісу облысында (Алакөл ауданы, Үшарал-Достық автожолы, Тоқты учаскесі) ауа райының қолайсыздығына байланысты жеңіл автокөлік қар құрсауында қалып қойған.
Құтқарушылар «Трэкол» жол талғамайтын көлігімен оқиға орнына жетіп, көлікте болған төрт адамды Қоқтыма ауылына жеткізді. Оларға медициналық көмек қажет болмады.
Сол түні Қостанай облысында тағы 59 адам қар құрсауынан құтқарылды. Бұл оқиға Денисов ауданындағы Қарабұтақ-Қостанай автожолында автобус сынып қалған кезде орын алған. Құтқарушылар адамдарды Денисовка ауылына эвакуациялады. Бұл жолы да зардап шеккендерге медициналық көмек қажет болған жоқ.
Құтқарушылар ауа райы болжамын мұқият бақылап, қолайсыз жағдайда алыс сапарлардан аулақ болуға кеңес береді.