Абай облысының дәрігерлері әйел адамның ішінен 6 келіден асатын ісікті алып тастады, – деп хабарлайды aqshamnews.kz тілшісі.
Абай облыстық денсаулық сақтау басқармасының мәлімдеуінше, өңір хирургтары бірегей оқиғаны бастан өткерді: 47 жастағы әйелдің құрсақ қуысынан салмағы 6 келі 200 грамм болатын алып ісік табылды.
Бір қызығы, науқасты бұған дейін ешқандай ауырсыну немесе мазасыздық белгілері мазаламаған. Ол өзінің бойындағы қатерлі дерт туралы тек пневмониямен ауырып, ауруханаға қаралған кезде ғана білген. Тексеріс барысында дәрігерлер оны қосымша тексеруге жіберіп, іштегі алып түзілісті анықтаған.
Ауруханаға түскен кезде науқастың іші айтарлықтай үлкейіп, тәбеті төмендегені байқалған.
Ота екі кезеңнен тұрды. Алдымен дәрігерлер науқастың құрсақ қуысынан 7 литр сұйықтықты шығарды. Содан кейін хирургтар командасы бірнеше сағатқа созылған күрделі ота жасап, диаметрі 31 сантиметр, салмағы 6200 грамм болатын ісікті сәтті алып тастады.
«Науқасқа сол жақ аналық бездің муцинозды шекаралық ісігі деген диагноз қойылды. Бұл – ұзақ уақыт бойы ешқандай белгісіз дами беретін эпителийлі ісік түрі», – деп түсіндірді мамандар.
Қазіргі таңда пациент дәрігерлердің жіті бақылауында. Мамандардың айтуынша, оның өміріне төніп тұрған қауіп жоқ, жағдайы тұрақты.