2025 жылдың басынан бері 297,4 мың қазақстандық Skills Enbek кәсіптік оқыту платформасында онлайн-курстардан өтіп, сертификат алды. Оның ішінде 47,5 мыңға жуық азамат жұмыссыздар қатарынан. Бүгінде платформада барлығы 827,6 мың адам тіркелген, олардың 328,9 мыңы биыл қосылған. Жоба іске қосылған уақыттан бері 708,3 мың адам оқудан өтті.
Жұмыссыздардың ішінде 13,3 мыңға жуығы Түркістан, Қызылорда облыстарынан, Алматы және Шымкент қалаларынан. Платформада түрлі бағыт бойынша 1 000-нан астам курс жарияланған, оның 340-ы тегін. Сондай-ақ Courstore, Fluent Education және Яндекс Қазақстан серіктестері дайындаған курстар қолжетімді. Оқыту ұзақтығы 1-ден 72 сағатқа дейін.
Тамыз айында ең сұранысқа ие болған курстар қатарында «Сенің мансаптық бастамаң: Электрондық еңбек биржасын пайдалану жолдары», «Управление персоналом», «Кассир», «Страховой агент», «Пішу және тігу» сияқты бағдарламалар бар. Әлеуметтік қызмет көрсету және басқа да салалардағы тегін курстар саны артып келеді.
Платформа «өмір бойы оқыту» тұжырымдамасын ілгерілетуге бағытталған. Білім алушылар оқудың қарқыны мен тілін өздері таңдап, оқу барысын бақылап, курс авторларымен байланыса алады. Оқу соңында тест тапсырылады, оны 70 пайыздан жоғары нәтижемен аяқтағандар дағдыларды игеру туралы сертификат алады. Сертификат автоматты түрде Enbek.kz түйіндемесіне енгізіледі және жұмыс берушілерге көрініп тұрады.
Курстарды орналастыру авторлар үшін тегін. Олар мемлекеттік, орыс және ағылшын тілдерінде ұсынылады және мәтін, бейне, аудио, инфографика сияқты түрлі форматтарды қамтиды. Арнайы қажеттіліктері бар азаматтар үшін интерфейс бейімделген. Авторларға сабақ құрастыру құралы, статистика, сертификат үлгілері және онлайн-калькулятор қолжетімді.
2023 жылдың желтоқсанынан бастап курстарды Enbek мобильді қосымшасы арқылы да өтуге болады. Қосымша Google Play және App Store дүкендерінен жүктеледі. Платформаға тіркелу немесе жұмыс істеу бойынша сұрақтарға «ЕРДО» АҚ жауап береді: 8 (7172) 95 43 17 (ішкі 877, 888).