Ақмола облысында балаларына алимент төлеуден ұзақ уақыт жалтарған борышкердің қарызы 2,2 млн теңгеден асып кеткен, деп хабарлайды Aqshamnews.kz тілшісі.
Прокуратура мәліметінше, 2025 жылы Бұланды ауданында кәмелетке толмаған балаларын асырауға қаражат төлеуден жалтару фактісі бойынша ҚР ҚК-нің 139-бабы негізінде сотқа дейінгі тергеу басталған.
Аудандық прокуратура борышкердің алимент бойынша міндеттемелерін орындауға қатысты тиісті шаралар қолданбай, ұзақ уақыт әрекетсіз болғанын анықтаған. Соның салдарынан берешек көлемі 2,2 млн теңгеден асқан.
"Сот үкімімен борышкерге 1 жылға бас бостандығын шектеу жазасы тағайындалды", – делінген қадағалау органының хабарламасында.
Прокуратура ата-аналардың сот шешімі бойынша балаларын күтіп-бағуға арналған төлемдерді үш айдан астам орындамағаны үшін екі жылға дейін бас бостандығын шектеу немесе бас бостандығынан айыру түріндегі қылмыстық жауапкершілік қарастырылғанын еске салды.