ҚР ІІМ Көші-қон қызметі комитетінде 2025 жылдың қорытындылары шығарылды, - деп хабарлайды Aqshamnews.kz.
2026 жылғы 1 қаңтардан бастап Қазақстанда жеке куәлікті алғаш рет рәсімдеу, сондай-ақ оның қолданылу мерзімі аяқталғаннан кейін ауыстыру тегін болады. Бұл туралы ІІМ хабарлады.
Бастама құжаттарды алуды жеңілдетуге және азаматтардың қаржылық жүктемесін азайтуға бағытталған. Мемлекеттік баж алғашқы рет жеке куәлік алу кезінде де, жоспарлы ауыстыру кезінде де алынбайды.
ҚР ІІМ Көші-қон қызметі комитетінің төрағасы Аслан Аталықовтың айтуынша, жыл басынан бері елде 1,9 млн жеке куәлік, 1,1 млн паспорт және 303 мың балалар паспорты берілген.
Биыл құжат алған ең жасы үлкен азамат - 1915 жылы туған Қостанай қаласының тұрғыны. 2024 жылдан бастап балаларға арналған паспорттар 24 беттен, ал ересектерге арналған паспорттар 36 және 48 беттен шығарылады.
Сондай-ақ комитетте авиациялық қауіпсіздік бойынша кешенді аудит қорытындысына сәйкес, қазақстандық паспорттың ИКАО стандарттарына сәйкестік деңгейі 95,7% болғаны атап өтілді. Бұл әлемдік орташа көрсеткіштен (72%) және Еуропадағы орташа деңгейден (87,9%) жоғары.