2025 жылы Азық-түлік келісімшарт корпорациясының еншілес ұйымы - «Астық қоймалары» жауапкершілігі шектеулі серіктестігі элеваторлардың тұрақты жұмысын қамтамасыз етіп, астықтың, оның ішінде мемлекеттік қордың сақталуын толық деңгейде жүзеге асырды, - деп хабарлайды aqshamnews.kz.
Қаңтар айынан желтоқсан айына дейін серіктестіктің астық қабылдау пункттеріне 434 мың тонна астық қабылданды, оның 358 мың тоннасы — жаңа өнім. 2026 жылғы 19 қаңтардағы жағдай бойынша «Астық қоймалары» серіктестігінің элеваторларында 264 мың тонна астық сақтаулы.
Жыл бойы төрт астық базасынан 432 мың тонна дәнді және майлы дақылдар жөнелтілді. 2024 жылдың осы кезеңімен салыстырғанда жөнелту көлемі 25 пайызға өсті.
Астық қабылдау үдерісінің ашықтығын қамтамасыз ету мақсатында барлық астық қабылдау бекеттерінде ауыл шаруашылығы өнімін өлшеудің сурет арқылы тіркеуі бар ақпараттық жүйе енгізілді. Бұл адам факторы әсерін барынша азайтуға мүмкіндік береді.
Өткен жылдың қорытындысы бойынша серіктестік астық қабылдау бекеттерінің инфрақұрылымын күтіп-ұстау және жаңғыртуға 404 миллион теңге бөлді. Үш астық базасы үшін астық кептіргіш қондырғылар мен автокөлік сатып алынды, қойма ғимараттары жөнделді, сондай-ақ теміржол кірме жолдарындағы бағыттама ауыстырылды.
2026 жылы «Астық қоймалары» өндірістік қуаттарды жаңғыртуды жалғастыра отырып, элеватор желісінің мүмкіндіктерін кеңейтуге бағытталған инвестициялық жобаларды іске асыруды жоспарлап отыр.