Кеше, 16 қазанда, "Хан-Тәңірі" командасының 19 жастағы шабуылшысы Диас Төлеу матч үстінде көз жұмды, деп хабарлайды Аqshamnews.kz тілшісі. Жас футболшының қазасына қатысты қандай деректер белгілі?
Қайғылы жағдайдың мән-жайы
Оқиға Бірінші лигадағы «Хан-Тәңірі» – «Екібастұз» матчының 64-минутында болды. Диастың денсаулығы кенет нашарлап, оны алаңнан зембілмен алып шықты. Көп ұзамай ойыншының қайтыс болғаны ресми түрде жарияланды. Қайғылы жағдайдың нақты себебі әзірге ресми аталған жоқ.
ҚФФ-ның әрекеті
Қазақстан футбол федерациясы жақын уақытта құзырлы органдармен бірлескен арнайы комиссия құрылып, оқиға жан-жақты тергелетінін мәлімдеді. ҚФФ басшылығы да жағдайды анықтау үшін Алматыға ұшып кетті:
"Бас хатшы Давид Лория және кәсіби клубтар арасындағы жарыстар дирекциясының басшысы Бақытжан Пазылхаир барлық мән-жайды анықтау үшін шұғыл түрде Алматыға ұшып барады", - делінген федерация хабарламасында.
Диас Төлеу - жас талант
ҚФФ мәліметінше, Диас жастығына қарамастан футболға деген құштарлығымен және дарынымен көзге түскен. Ол «Қайрат» академиясының түлегі, 2006 жылы 4 мамырда туған. 2024 жылғы сәуірде «Хан-Тәңіріне» ауысты. Биылғы маусымда Бірінші лигада 18 матчқа қатысып, гол мен нәтижелі паспен ерекшеленбеген. Жасөспірімдер құрамында «Қайрат» сапында шамамен 15 матч өткізіп, 3 гол соғып, 2 голдық пас берген.
Клубтың мәлімдемесі
"Қайрат" футбол клубы қайғылы жағдайға қатысты жазба жариялады.
"Бүгін 19 жасында «Хан-Тәңірі» ойыншысы, «Қайрат» ФК Академиясының түлегі Диас Төлеу өмірден өтті. Диас 2016–2023 жылдары біздің Академияда тәрбиеленіп, алғашқы QJ League маусымында «Қайрат» U-18 командасының сапында чемпион атанған. Ол мейірімділігімен, еңбекқорлығымен және мақсаткерлігімен ерекшеленіп, бапкерлері мен командаластарының құрметіне ие болды. «Қайрат» футбол клубы Диастың туған-туыстары мен жақындарына шын жүректен көңіл айтады. Қайғыларыңызға ортақпыз", - делінген клубтың хабарламасында.
