Атырау облысында Қаржылық мониторинг агенттігі мен прокуратураның үйлестіруімен Бірыңғай жинақтаушы зейнетақы қорынан (БЖЗҚ) 200 млрд теңгеден астам қаражатты заңсыз шешуге қатысы бар қылмыстық топ әшкереленді, деп хабарлайды Аqshamnews.kz тілшісі.
Тергеу барысында БЖЗҚ қаржысын заңсыз иемденуге көмектескен 5 ұйымдасқан топтың әрекеті анықталды. Олар жалған құжаттар жасап, Атырау, Астана, Алматы, Шымкент, Ақтау және өзге де қалаларда бар сияқты етіп 30-дан астам жалған стоматологиялық клиника тіркеген.
Анықталғандай, бұл клиникалар іс жүзінде халыққа ешқандай қызмет көрсетпеген: ғимараттары, жабдықтары және білікті мамандары болмаған, ал басшыларының медициналық білімі де жоқ болған.
Күдіктілер азаматтардың зейнетақы ақшасын шешіп алу үшін жалған медициналық құжаттар рәсімдеп, одан 10–20 пайыз көлемінде заңсыз сыйақы алып отырған. Қаражатты қолма-қол ақшаға айналдыру үшін 226 дропперді пайдаланған. Осылайша 200 млрд теңгеден астам қаражат айналымнан шығарылған.
Бұл ақшаларға күдіктілер жалпы құны 600 млн теңгеден асатын 15 қымбат автокөлік (Mercedes-Benz G-class, GLE, BMW X7, Porsche Taycan, Cadillac Escalade) сатып алып, сондай-ақ элиталық пәтерлер, коммерциялық нысандар, жер телімдері мен зергерлік бұйымдарды иемденген. Қылмыстық жолмен табылған мүлікті іздестіру жалғасып жатыр.
Қазір іс аясында 59 тінту ісі жүргізіліп, 10 адамға бұлтартпау шарасы қолданылды.
"Тергеу тек зейнетақы активтерін заңсыз шығару схемаларын ұйымдастырушылардың әрекеттеріне баға береді. Өзінің жинақталған зейнетақы қаражатын алған азаматтар қылмыстық жауапкершілікке тартылмайды. Барлық процессуалдық әрекеттер қолданыстағы заңнамаға сай жүргізіліп жатыр, әр күдіктінің адвокатпен байланысы шектелмеген", - делінген агенттік хабарламасында.