«Қазгидромет» синоптиктері 14, 15 және 16 наурызға арналған ауа райы болжамын жариялап, елдің басым бөлігінде жылы әрі құрғақ ауа райы күтілетінін мәлімдеді, деп хабарлайды Aqshamnews.kz тілшісі.
Синоптиктердің болжауынша, алдағы 14-16 наурыз күндері Қазақстан аумағының басым бөлігінде ауқымды антициклонның әсерінен жылы әрі жауын-шашынсыз ауа райы сақталады.
Тек елдің солтүстік және шығыс өңірлерінде атмосфералық фронттардың өтуіне байланысты жауын-шашын, яғни жаңбыр мен қар күтіледі. Сонымен қатар бұл аймақтарда көктайғақ болып, жел күшейіп, боран соғуы мүмкін.
Жалпы республика бойынша тұман түсуі ықтимал.
«Қазгидромет» мәліметінше, күндізгі ауа температурасы батыс пен оңтүстікте +3...+15 градусқа дейін көтеріледі. Ал солтүстік, шығыс және орталық өңірлерде ауа температурасы -2...+5 градус аралығында болады.
Сондай-ақ синоптиктер 2026 жылғы наурыз айы Қазақстанның басым бөлігінде қалыпты межеден жылырақ өтетінін болжап отыр. Ай ішінде жауын-шашын мөлшері де көпжылдық нормадан жоғары болуы мүмкін.
Мамандардың айтуынша, наурызда ауа райы тұрақсыз болады: солтүстікте қар мен боран басым болса, оңтүстік пен батыста жаңбыр мен жылбысқы қар күтіледі. Ауа температурасы жалпы алғанда климаттық нормадан шамамен 1 градусқа жоғары болады. Сонымен бірге қысқа мерзімді салқындау кезеңдері де болуы ықтимал.