Алматыда 14 наурыз күні Көрісу күніне орай Көктөбеде мерекелік концерт ұйымдастырылады, деп хабарлайды Aqshamnews.kz тілшісі.
Алматы қаласының тұрғындары мен қонақтары 14 наурыз күні Көктөбеде өтетін Көрісу күні мерекесіне шақырылады. Іс-шара сағат 12:00-де басталады.
Мерекелік бағдарлама аясында көпшілікке арнайы концерттік кеш ұсынылады. Сахнада Айгүл Қосанова, Мәдина Сәдуақасова, «Алатау серілері» тобы, КешYOU, «Made in KZ» тобы, «Тұмар» тобы, Алатау дәстүрлі өнер театрының артистері мен «Салтанат» мемлекеттік би ансамблінің өнерпаздары өнер көрсетеді.
Ұйымдастырушылардың мәліметінше, Көрісу күніне орай 14 наурызда сағат 10:00-ден 15:00-ге дейін Көктөбеге апаратын аспалы жол тегін қызмет көрсетеді. Аспалы жол Достық даңғылы, 104Б мекенжайында орналасқан.
Мерекелік шара аясында алматылықтар мен қала қонақтары ұлттық мейрамның ерекше атмосферасын сезініп, отандық өнер жұлдыздарының концертін тамашалай алады.