Ұлттық банк төрағасы Тимур Сүлейменов "Ұлттық қор – балаларға" бағдарламасы аясында 12 мыңға жуық баланың төлем алушылар қатарынан шығарылуына қатысты пікір білдірді, – деп хабарлайды aqshamnews.kz тілшісі.
Мәжіліс кулуарында журналистер Ұлттық қордан төлем алу құқығынан айырылған 12 мың бала туралы және бұл қаражаттың өзге балалар арасында қайта бөлінгені жөнінде сұрақ қойған.
Тимур Сүлейменов мұндай балалардың нақты санын білмейтінін айтты. Алайда оның сөзінше, Қазақстан азаматтығынан бас тартқан балаларға бұл төлем берілмейді.
"Егер бала басқа елге көшіп кетсе, азаматтығын ауыстырса және өзге де осындай жағдайлар болса, оның жеке шотына түскен аударымдар жойылуы мүмкін. Бұл жолы да сондай жағдай болған сияқты. Нақты қанша баланың қаражаты қайта бөлінгенін айту қиын. Егер бала Қазақстан азаматтығынан бас тартып, шетелге кетсе, бұл – оның және ата-анасының таңдауы. Ондай жағдайда қаражат жүйеде қалып, басқа балалар арасында бөлінеді", – деді Тимур Сүлейменов.