Алматы қаласы Ішкі саясат басқармасының қолдауымен Social project management орталығы «Заң кеңесі» жобасы аясында дөңгелек үстел өткізді, - деп хабарлайды Aqshamnews.kz.
Оның мақсаты - Мемлекет басшысы Қасым-Жомарт Тоқаевтың Жолдауында көрсетілген «Заң және тәртіп» қағидатын орнықтыру.
Дөңгелек үстелге заңгерлер, құқық қорғаушылар, мемлекеттік және құқық қорғау органдары, үкіметтік емес ұйым өкілдері, қала тұрғындары, жастар қатысты.
«Заң кеңесі» жобасының басты заңгері Қуат Ауғанбек бүгінгі дейін тұрғындарға қандай көмек көрсетілгенін айтты.
- Алматыда «Заң кеңесі» жобасы 3 жылдан бері жалғасып келе жатыр. Ол алматылықтардың құқықтық сауаттылығын арттыру, әлеуметтік осал топтағы азаматтарға заң тұрғысынан кеңес беріп, тегін көмектесуді көздейді. Осы уақыт аралығында мыңға жуық адамға құқықтық тұрғыда бағыт-бағдар бердік. Бұл жоба мемлекет тарапынан азаматтарымызға үлкен қолдау деп білеміз, - деді ол.
Social project management орталығының директоры Бейбіт Молдахметұлы қоғамда құқықтық сана өсіп жатқанын айтты.
- Заң органдарына жүгінетіндердің қарасы көбейген. Мысалы, 1 жылда сотқа арыз түсіретіндер саны 3 есе көбейген. Яғни, адамдар өзара кикілжіңді сот арқылы заң аясында шешуге көшкен. Ол құқықтық сананың өсіп жатқанын көрсетеді. Ал біздің мақсатымыз осы өсіп жатқан санаға серпін беру, - деді ол.
Сонымен қатар Бейбіт Молдахметұлы қала тұрғындары орталыққа қандай сұрақтар бойынша жиі жүгінетінін атап өтті.
- Азаматтар көбіне қандай мәселе бойынша қай органға өтініш не шағым жазу керек екенін білмейді. Осы жағынан біздің заңгерлер кеңес береді. Алимент өндіру мәселесі жиі қозғалады. Сондай-ақ, өткір сұрақтар ішінде жер дауы бар. Одан бөлек келісімшартсыз бір іс-әрекет жасап қоятындар көп. Ауызша келісім жасалады да, кейін қарызын қайтармай қояды деген секілді. Ал заңгерлер келісімшарт бар кезде ғана заң күшін қолдана алады. Сонда да біздің заңгерлер мессенджерлердегі хат алмасу арқылы жәбірленушіге көмектесуге тырысады, - деді Бейбіт Молдахметұлы.