Бүгін, 2026 жылдың 9 қаңтарында президент Қасым-Жомарт Тоқаев Цифрлық кодекске қол қойды, деп хабарлайды Аqshamnews.kz тілшісі.
Айта кетейік, Цифрлық кодексті парламент былтыр күзде қабылдаған болатын.
Мәжіліс депутаты, «AMANAT» партиясы фракциясының мүшесі, Экономикалық реформа және өңірлік даму комитетінің төрағасы Нұртай Сабильяновтың айтуынша, Цифрлық кодекс жобасы мен екі ілеспе заң жобасы президенттің 2023 жылғы 1 қыркүйектегі Қазақстан халқына жолдауын іске асыру мақсатында әзірленген. Кодекс жобасы мен ілеспе заң жобаларына парламент депутаттары бастамашылық еткен.
"Цифрлық кодекстің жобасы 10 тараудан тұрады. Кодекс жобасы цифрлық ортадағы қатынастарды, оның ішінде құқықтық қатынас объектілерінің түрлері, цифрлық орта субъектілері, цифрлық сәйкестендіру және бақылау, тәуекелдерді басқару бойынша қатынастарды реттеуге, цифрлық ортада жеке адамның, қоғамның және мемлекеттің қауіпсіздігін қамтамасыз етуге бағытталған", - деген еді Сабильянов Мәжілістің жалпы отырысында.
Ал ілеспе заң жобаларында мемлекеттік қызмет көрсетудің қағидаттарын айқындау және сақтау жөнінде толықтырулар, мемлекеттік қызмет көрсету саласындағы заңнамалық актілерде белгіленген талаптарды сақтамағаны үшін әкімшілік жауапкершілік енгізу көзделген.
Комитет заң жобалары бойынша қорытынды әзірлейді.