باۋىرجان مومىشۇلىنا رەسمي تۇردە "حالىق قاھارمانى" اتاعى بەرىلدى

بۇل تۋرالى پرەزيدەنت جامبىل وبلىسىنىڭ جۇرتشىلىعىمەن كەزدەسۋىندە ايتتى.

"كەشە باۋىرجان مومىش ۇلىنىڭ تۋعانىنا 115 جىل تولدى. داڭقتى قولباسشىنىڭ ناعىز ەرلىك جولى ەلىمىزبەن قاتار، شەتەلدەردە وتە تانىمال.

حالقىمىز ونى قاھارمان تۇلعا رەتىندە قۇرمەت تۇتادى. ءبىراق ايگىلى باتىرعا رەسمي تۇردە "حالىق قاھارمانى" اتاعى بەرىلمەگەن. وبلىس جۇرتشىلىعى، زيالى قاۋىم وكىلدەرى، ءتىپتى، جاستارىمىز دا وسى ماسەلەنى كوتەرىپ جۇرگەنىن بىلەمىز. تاريحي ادىلدىكتى قالپىنا كەلتىرۋىمىز كەرەك.

سوندىقتان مەن مەملەكەت باسشىسى رەتىندە باۋىرجان مومىشۇلىنا "حالىق قاھارمانى" اتاعىن بەرۋ تۋرالى شەشىم قابىلدادىم. ءتيىستى جارلىققا بۇگىن قول قويدىم.
باتىردىڭ ەسىمى ناعىز وتانشىلدىق پەن وشپەس ەرلىكتىڭ سيمۆولى رەتىندە ءاردايىم كوپكە ۇلگى-ونەگە بولۋعا ءتيىس.

باۋكەڭنىڭ ەرلىگى جاي اڭىز ەمەس، بۇل – ناقتى قۇجاتتارمەن دالەلدەنگەن، ۇلى وتان سوعىسىنا قاتىسقان باتىرلار مويىنداعان ءسوزسىز ەرلىك.

ەلگە ەرلىگىمەن تانىلعان، ەڭبەگى سىڭگەن ازاماتتارىن باعالاي بىلگەن جۇرت ەشقاشان ۇتىلمايدى"، - دەدى پرەزيدەنت.

ەسكە سالايىق، 24 جەلتوقسان - باۋىرجان مومىش ۇلىنىڭ تۋعان كۇن. ول – قازاق حالقىنىڭ جاۋىنگەرلىك رۋحىن، باتىرلىق بولمىسىن جانە پاراساتتى ويلاۋ مادەنيەتىن الەمگە تانىتقان بىرەگەي تۇلعا. Aqshamnews.kz ءتىلشىسى باتىردىڭ ومىرىنە قاتىستى كوپشىلىك بىلە بەرمەيتىن جانە قىزىقتى دەرەكتەر توپتاماسىن ۇسىنادى.

باۋىرجان مومىش ۇلى تۋرالى نە بەلگىلى؟

ول 1910 جىلعى 24 جەلتوقساندا جامبىل وبلىسى، جۋالى اۋدانى، قاراباستاۋ اۋىلىندا دۇنيەگە كەلگەن. 1932 جىلى اسكەرگە شاقىرىلدى. ورتا ازيا اسكەري وكرۋگى 3ء-شى تۇركىستان اتقىشتار ديۆيزياسىنىڭ 14ء-شى تاۋلى اتقىشتار پولكىندە ءبىر جىلدىق كۋرستى ءتامامداعاننان كەيىن ۆزۆود كومانديرى قىزمەتىن اتقاردى.

1936 جىلى قيىر شىعىستا 105ء-شى اتقىشتار ديۆيزياسىنىڭ 315ء-شى اتقىشتار پولكىندە ارتيللەريالىق ديۆيزيون كومانديرى بولىپ قىزمەت ەتتى. 1938 جىلى حاسان كولى ماڭىندا جاپوندىقتارمەن بولعان شايقاستارعا قاتىستى. 1940 جىلعى اقپاندا كييەۆ ايرىقشا اسكەري وكرۋگىنە اۋىستىرىلىپ، 24ء-شى اتقىشتار ديۆيزياسىنىڭ 406-شى اتقىشتار پولكىندە شتاب باستىعىنىڭ كومەكشىسى قىزمەتىن اتقاردى. 1941 جىلعى قاڭتاردا ورتا ازيا اسكەري وكرۋگىنە جىبەرىلىپ، قازاق كسر اسكەري كوميسسارياتىنىڭ اسكەردەن تىس دايارلاۋ بولىمىنە اعا نۇسقاۋشى بولىپ تاعايىندالدى.

1941 جىلى قازاقتىڭ 316-شى ديۆيزياسى گەنەرال پانفيلوۆتىڭ قولباسشىلىعىمەن ۆولوكولامسك باعىتىندا ماسكەۋدى قورعادى. 1941 جىلعى 16-18 قاراشادا اعا لەيتەنانت باۋىرجان مومىش ۇلىنىڭ باتالونى ماترەنينو اۋىلىندا ديۆيزيادان ءبولىنىپ قورعانىس جاسادى. كومبات شەبەر باسشىلىعىنىڭ ارقاسىندا جاۋدى وسى شەپتە ءۇش كۇنگە تەجەپ، ءتورتىنشى كۇنى باتالوندى قورشاۋدان امان الىپ شىقتى.

قاراشا ايىنىڭ سوڭىندا پولك كومانديرى بولىپ تاعايىندالدى. كاپيتان باۋىرجان مومىش ۇلى كەڭەس وداعىنىڭ باتىرى اتاعىنا ۇسىنىلسا دا، بۇل اتاق وعان تەك دۇنيەدەن وتكەننەن كەيىن عانا بەرىلدى. 1945 جىلعى قاڭتاردا ك. ە. ۆوروشيلوۆ اتىنداعى جوعارى اسكەري اكادەميا جانىنداعى وفيسەرلەر قۇرامىن جەتىلدىرۋ كۋرستارىن اياقتاعان سوڭ، 2ء-شى بالتىق مايدانى، 6-شى گۆارديالىق ارميا، 2ء-شى گۆارديالىق اتقىشتار كورپۋسى، 9-شى گۆارديالىق اتقىشتار ديۆيزياسى كومانديرىنىڭ ورىنباسارى قىزمەتىنە تاعايىندالدى. الايدا 1945 جىلعى 28 قاڭتاردان سوعىستىڭ سوڭىنا دەيىن ديۆيزيا كومانديرىنىڭ مىندەتىن اتقاردى.

1946 جىلعى قاڭتاردا ك. ە. ۆوروشيلوۆ اتىنداعى جوعارى اسكەري اكادەمياعا جىبەرىلدى. 1950 جىلعى قاراشادان باستاپ ۆ. م. مولوتوۆ اتىنداعى كەڭەس ارمياسىنىڭ تىل جانە جابدىقتاۋ اسكەري اكادەمياسىندا جالپى تاكتيكا جانە وپەراسيالىق ونەر كافەدراسىنىڭ اعا وقىتۋشىسى بولدى.

1955 جىلعى جەلتوقساندا زاپاسقا شىعارىلدى. الماتىعا ورالعان سوڭ ءومىرىن تولىقتاي ادەبي شىعارماشىلىققا ارنادى. 1982 جىلعى 10 ماۋسىمدا الماتىدا قايتىس بولدى. كەنساي زيراتىنا جەرلەندى. كەڭەس وداعىنىڭ باتىرى اتاعى 1990 جىلعى 11 جەلتوقساندا بەرىلدى.