«Qarty bar úıdíń – qazynasy bar» deıdí dana halqymyz. Ótken men búgíndí jalǵap, keıíngí ūrpaqqa ónegelí jol kórsetíp otyrǵan qarıyalarymyzdy ardaqtau – bízdíń azamattyq ta, perzenttík te paryzymyz.
Úlkenge qūrmet kórsetu — halqymyzdyń ūrpaqtan ūrpaqqa jalǵasyp kele jatqan asyl dástúrí. Osy qūndylyqty balalardyń boıyna síńírude shynaıy qarym-qatynas pen ıgí ístíń orny erekshe. «Halyqaralyq qarttar» kúní qarsańynda mektebímízdíń ūstazdary men oqushylarymen bírge Almaty qalasyndaǵy «Úıdegí qamqorlyq ortalyǵyna» bardyq. Ortalyqtaǵy ardaqty qarıyalarymyzǵa arnap merekelík kontsert ūıymdastyryp, ízgí tílekterímízdí jetkízdík.
Mektep dırektory retínde būl kezdesudí ūıymdastyruǵa ózím bastamashy boldym. Bízdíń būl ıgí qadamymyzǵa Almaty qalasy Bostandyq audanynyń bílím bólímí qoldau kórsettí. Ūstazdarymyzdyń qajyrly eńbegí, oqushylarymyzdyń yntasy men ata-analardyń jan-jaqty kómegí ortaq maqsatqa ūlasyp, ardaqty qarıyalarymyzǵa úlken quanysh syılauǵa múmkíndík berdí. Būl ıgí ístíń negízgí maqsaty – jalǵyzbasty qarttarǵa jylulyq syılau, olardyń kóńílín aulau jáne ósíp kele jatqan jas ūrpaqtyń boıyna meıírímdílík, janashyrlyq, úlkendí syılau sıyaqty adamı qūndylyqtardy síńíru boldy.
Kezdesu barysynda mektep oqushylary ardaqty qarıyalarymyzǵa ózderí daıyndaǵan shaǵyn kontserttík baǵdarlamasyn tartu ettí. Shákírtterímíz án shyrqap, bı bılep, kúı tartyp, óleń oqyǵanda, qarttarymyzdyń júzínen úlken quanysh pen tolqynys baıqaldy. Árbír óner kórsetuden balalardyń shynaıy yqylasy men úlkenderge degen sheksíz qūrmetí anyq sezílíp tūrdy.Sonymen qatar, oqushylar óz qoldarymen jasaǵan syılyqtary men mektep atynan daıyndalǵan estelík tartulardy tabys ettí.
Bíz úshín eń áserlí sát – qarıyalarymyzdyń aq batasyn alǵan sát boldy. Olardyń kózderíndegí qımastyq pen alǵysqa toly meıírímdí qarasty kóríp, būl ıgí ístíń balalar úshín úlken ómírlík sabaq bolǵanyn túsíndím. Sanaly ūrpaq tárbıeleu – tek partada otyryp bílím berumen shektelmeıdí. Mūndaı ıgí íster oqushylardyń júregínde ómír boıy óshpes íz qaldyratyny sózsíz.
Kezdesudíń eń jyly sátteríníń bírí — kontsertten keıíngí áńgímelesu boldy. Oqushylar qarıyalardyń ómír joly turaly áńgímelerín tyńdap, olarǵa ízgí tílekterín bíldírdí. Osyndaı sátterde qarapaıym kóńíl bóludíń, jyly sóz ben yqylastyń adam úshín qanshalyqty qymbat ekenín tereń sezínesíń.
Bízdí qabyldaǵan ortalyq ūjymy men ardaqty qarıyalarymyzǵa alǵysym sheksíz. Osyndaı kezdesulerdíń ízgí dástúrge aınalyp, ūrpaqtar arasyndaǵy syılastyq pen baılanysty nyǵaıta beretíníne senemín. Qaıyrymdylyq sharasyna belsene qatysqan mektebímízdíń ūstazdaryna jáne júregí jyly, meıírímdí oqushylaryma mektep ákímshílígí atynan jáne óz atymnan zor alǵysymdy bíldíremín. Balalarynyń tárbıesíne belsene aralasyp, demeushílík kómek kórsetken ata-analarymyzǵa da rızashylyǵymdy bíldíremín. Būl kezdesu mektep pen otbasynyń bírlese atqarǵan eńbegíníń nátıjesí boldy.
Úlkendí qūrmetteu – ūltymyzdyń ūly qasıetí, endeshe aınalamyzǵa meıírím syılaudan sharshamaıyq!
Dınara Bauyrjanqyzy №37 jalpy bílím beretín mekteptíń dırektory