Qazaqstan Respublıkasy Premer-mınıstríníń bírínshí orynbasary Nūrlybek Nálíbaev Qytaı Halyq Respublıkasy Memlekettík keńesí Premerí orynbasarynyń shaqyruymen Qazaqstan Úkímetíníń delegatsıyasyn bastap Beıjíń qalasyna jūmys saparymen baryp, «Jahandyq ornyqty kólík forumyna» qatysty.
Forumnan būryn Qazaqstan Respublıkasynyń Qytaı Halyq Respublıkasyndaǵy elshílígínde «CITIC Group» dırektorlar keńesíníń tóraǵasy Sı Gohuany II dárejelí «Dostyq» ordenímen saltanatty marapattau rásímí óttí.
Qazaqstan Respublıkasynyń Prezıdentí Qasym-Jomart Toqaevtyń atynan joǵary memlekettík marapatty Nūrlybek Nálíbaev tabystap, Sı Gohuanyń qazaq-qytaı dostyǵyn nyǵaıtuǵa jáne ózara tıímdí sauda-ekonomıkalyq yntymaqtastyqty damytuǵa qosqan eleulí jeke úlesín atap óttí. Sondaı-aq «Dostyq» ordenín tabystau qazaq-qytaı qatynastarynyń beríktígín aıqyndaıtyn taǵy bír sımvolǵa aınalyp, «CITIC Group» kompanıyasymen yntymaqtastyqty odan árí keńeıtuge qosymsha serpín beretíníne sením bíldírdí. Sı Gohua Qazaqstan Respublıkasynyń Prezıdentí Qasym-Jomart Kemelūlyna joǵary memlekettík marapat úshín shynaıy alǵysyn bíldírdí. Būl marapatty ekí memleket basshylarynyń strategıyalyq basshylyǵymen júzege asyrylyp jatqan bírlesken kúsh-jígerdí, Qazaqstan men Qytaıdyń ískerlík toptarynyń ekíjaqty yntymaqtastyqty nyǵaıtuǵa qosqan úlesín moıyndau retínde baǵalady. «CITIC Group» basshysy qazaq-qytaı qatynastarynyń erekshe sıpatyna jáne ekí eldíń ískerlík toptarynyń joǵary deńgeıde qol jetkízílgen uaǵdalastyqtardy júzege asyruǵa, memleketter arasyndaǵy sauda-ekonomıkalyq jáne ınvestıtsıyalyq ózara ís-qımyldy ílgeríletuge jauapkershílíkpen qaraıtynyn atap óttí. Nūrlybek Nálíbaev Transkaspıı halyqaralyq kólík baǵytyna (THKB) arnalǵan joǵary deńgeıdegí sessıyada sóz sóıledí. Atalǵan sessıyaǵa QHR Búkílqytaılyq halyq ókílderí jınalysy Tūraqty komıtetí tóraǵasynyń orynbasary Shohrat Zakır, Ázerbaıjan Respublıkasy Premer-mınıstríníń orynbasary Shahın Mustafaev jáne Qyrǵyz Respublıkasy Mınıstrler kabınetí tóraǵasynyń orynbasary Erlıst Akunbekov qatysyp, bayandama jasady. Qatysushylar THKB-nyń halyqaralyq júk tasymaly júıesíndegí rólí jyl saıyn artyp kele jatqanyn jáne onyń Qytaı men Europany baılanystyratyn mańyzdy kólík dálízíne aınalǵanyn atap óttí.
Sessıyadan keıín ótken forumnyń saltanatty ashylu rásímínde QR Premer-mınıstríníń bírínshí orynbasary Qazaqstannyń kólík salasyn damytudaǵy basym baǵyttaryn, halyqaralyq mańyzy bar ınfraqūrylymdyq jobalardy, Qazaqstan men Qytaı arasyndaǵy júk tasymaly kólemíníń tūraqty ósímín, kólík-logıstıka salasyndaǵy ekíjaqty yntymaqtastyqtyń jańa múmkíndíkterín tanystyrdy. «Jahandyq ornyqty kólík forumynyń» jūmysyna shet memleketterdíń úkímettík jáne mınıstrlík deńgeıdegí delegatsıyalary, halyqaralyq ūıymdardyń, dıplomatıyalyq korpustyń, sarapshylar qauymdastyǵy men ískerlík toptardyń myńǵa juyq ókílí qatysty. Sapar baǵdarlamasynyń mańyzdy bólígí – Nūrlybek Nálíbaevtíń QHR Memlekettík keńesí Premeríníń orynbasary, Qazaqstan – Qytaı Yntymaqtastyq komıtetíníń teń tóraǵasy Dın Syuesyanmen alǵashqy ekíjaqty kezdesuí óttí. Kezdesude taraptar ekí eldíń sauda-ekonomıkalyq yntymaqtastyǵyn keńeıtu, auyl sharuashylyǵy men joǵary tehnologıyalar salalaryndaǵy jáne óńíraralyq baılanystardy damytu, ınvestıtsıyalyq ózara ís-qımyldy jandandyru, transshekaralyq ózender máseleleríne, Qazaqstan – Qytaı Yntymaqtastyq komıtetíníń qyzmetíne, ekíjaqty yntymaqtastyqtyń basqa da ózektí baǵyttaryna nazar audardy.
Sapar sheńberínde qytaılyq «China Communications Construction Company» (CCCC) prezıdentí Chjan Bınnanmen jáne «CITIC Group» kompanıyasy dırektorlar keńesíníń tóraǵasy Sı Gohuamen ekíjaqty kezdesuler óttí. Taraptar Qazaqstanǵa ınvestıtsıya tartu, bírlesken ınvestıtsıyalyq jáne ınfraqūrylymdyq jobalardy júzege asyru, jańa salalardaǵy yntymaqtastyq múmkíndíkterín talqylady.
