Dál saǵat 20:00-de Almatyda, elímízdíń barlyq óńíríndegídeı, Qazaqstan Respublıkasy Qūryltaı deputattaryn saılau boıynsha dauys beru ayaqtaldy, – dep habarlaıdy aqshamnews.kz tílshísí.
Eske salaıyq, saılau jańa Konstıtutsıya normalaryna sáıkes óttí.
Almaty Qūryltaı saılauynda joǵary azamattyq belsendílík kórsettí. Saǵat 20:00-degí málímet boıynsha qaladaǵy saılaushylardyń qatysu kórsetkíshí 43%-dan asyp, 570 myńnan astam almatylyq boldy. Salystyrsaq, Almatyda 2007 jylǵy parlament saılauynda saılaushylardyń 25,03%-y dauys berse, 2012 jyly būl kórsetkísh 41,37%, 2016 jyly 34,1%, 2021 jyly 29,28%, al 2023 jyly 25,15% bolǵan. Osylaısha, bıylǵy kórsetkísh Almatydaǵy parlament saılaularyna qatysu deńgeıí boıynsha keıíngí 20 jyldan astam uaqyttaǵy eń joǵary nátıje bolyp otyr.
Tańsáríden berí megapolıstegí saılau uchaskelerínde tūrǵyndardyń belsendílígí joǵary. Almatylyqtar saılauǵa otbasymen, dostarymen, áríptesterímen jáne kórshílerímen bírge kelíp jatyr.
Almatyda saǵat 07:00-de 670 saılau uchaskesí ashyldy. Būdan bólek, azamattar uaqytsha bolatyn jerlerde ornalasqan 11 arnaıy saılau uchaskesí bír saǵat būryn jūmysyn bastady.
Almaty boıynsha saılaushylar tízímíne 1,329 mıllıonnan astam tūrǵyn engízílgen.
Barlyq saılau uchaskesínde dauys beru Qazaqstan Respublıkasynyń Memlekettík Ánūranyn oryndaudan bastaldy
Uchaskeler ashylǵannan keıín alǵashqy saǵattyń ózínde kóptegen saılau uchaskecíne saılaushylar tūraqty túrde kelíp jatty.
Túske deıín Qūryltaı deputattaryn saılauda memlekettík organdardyń basshylary, deputattar, qoǵam qaıratkerlerí, mádenıet, ǵylym jáne sport salasynyń ókílderí dauys berdí.
Almaty qalasynyń ákímí Darhan Satybaldy №159 mektepte ornalasqan saılau uchaskesíne baryp, Qūryltaı saılauynda dauys berdí.
«Bíz Qūryltaıdyń alǵashqy saılauyna qatysyp, tarıhı sáttíń kuásí bolyp otyrmyz. Elímíz sayası tarıhtyń jańa kezeńíne qadam basty. Memleket basshysy Qasym-Jomart Kemelūly Toqaev saılau aldyndaǵy úndeuínde atap ótkendeı, elímízdíń bolashaǵy árqaısymyzdyń sanaly tańdauymyzǵa baılanysty. Qazaqstannyń erteńí ár azamattyń jauapkershílígí men bastamashyldyǵyna baılanysty», – dedí qala ákímí.
Dauys beruge alǵashqylardyń bírí bolyp qatysqandardyń qatarynda Almaty máslıhatynyń tóraǵasy Meıírjan Otynshıev te boldy. Ol ózí tírkelgen saılau uchaskesíne baryp, azamattardyń qala men eldíń qoǵamdyq ómíríne belsendí aralasuynyń mańyzyn atap óttí.
Almatylyq boıjetken úshín 23 tamyz qos bírdeı sebepke baılanysty erekshe kún boldy. Tuǵan kúnínde 18 jasqa tolǵan ol alǵash ret saılauǵa qatysyp, tańdau jasaı aldy.
Dástúr boıynsha saılauǵa alǵash ret qatysyp otyrǵan jastarǵa saılau uchaskelerínde estelík syılyqtar tabystaldy.
Sonymen qatar, saılau kúní Almatydaǵy saılau uchaskeleríníń bírínde saılaushylarǵa syılyq retínde Qazaqstan Respublıkasynyń jańa Konstıtutsıyasy tabystaldy.
Qazaqstannyń eńbek síńírgen qaıratkerí Asyly Osman tańerteńnen bastap azamattyq belsendílígín kórsettí. Ol №64 saılau uchaskesíne alǵashqylardyń bírí bolyp kelíp, dauys berdí.
Qoǵam qaıratkerí saılauǵa qatysudy ár azamattyń mańyzdy míndetí dep sanaıtynyn aıtyp, almatylyqtardy el úshín mańyzdy sharadan shet qalmaı, tańdau jasauǵa shaqyrdy.
– Mūndaı mańyzdy oqıǵa kún saıyn bola bermeıdí. Sondyqtan men úshín oǵan qatysu mańyzdy, – dedí Asyly Osman.
Qaladaǵy eńbek ūjymdary da saılauǵa belsendí qatysyp jatyr. Kúní boıy kásíporyndardyń, kommunaldyq qyzmetterdíń, kólík salasynyń jáne basqa da ūıymdardyń qyzmetkerlerí saılau uchaskeleríne ūıymdasqan túrde kelíp, dauys berude.
Ásírese, otbasymen bírge saılauǵa kelgen tūrǵyndardyń oqıǵasy erekshe áser qaldyrdy. Medeu audanyndaǵy №412 saılau uchaskesíne 69 jastaǵy Esenbek Ókteshbaev 90 jastaǵy anasy Aıymkúl Ánıyatovamen bírge kelíp, dauys berdí. Olar úshín saılauǵa bírge qatysu – azamattyq ūstanymyn bíldírumen qatar, el bolashaǵyna degen jauapkershílíktíń ūrpaqtan ūrpaqqa jalǵasatynyn kórsetetín erekshe sát boldy.
Osyndaı ūrpaq sabaqtastyǵyn basqa otbasylar da kórsetíp jatyr. Búgín dauys bergenderdíń qatarynda «Mereılí otbasy – 2025» ūlttyq baıqauynyń jeńímpazy Dúısebaevtar otbasy da bar.
Tórt buyn ūstazdy bíríktírgen pedagogter áuletí saılau uchaskesíne túgelge juyq jınalyp keldí. Ómírín bala tárbıesí men bílím beruge arnaǵan otbasy úshín saılauǵa qatysu – keleshek ūrpaq aldyndaǵy jauapkershílíktíń jalǵasy
Qala tūrǵyndary arasynda ardagerlerdíń saılauǵa qatysuy erekshe qūrmetke ıe boldy. Jetísu audanynda 100 jastaǵy Ūly Otan soǵysynyń ardagerí Ilya Kudın saılau uchaskesíne ózí kelíp, dauys berdí.
Al 103 jastaǵy soǵys ardagerí Zūlharnaı Seıítov úıínde dauys berdí. Ol dauys beru qūqyǵyn paıdalanudy mańyzdy dep sanap, saılauǵa qatysuǵa nıet bíldírdí. Osyǵan baılanysty saılau komıssıyasynyń múshelerí ardagerdíń úıíne baryp, dauys beruíne jaǵdaı jasady.
Kúní boıy mádenıet, óner, ǵylym jáne qoǵam salasyna eńbegí síńgen tanymal tūlǵalar da tańdau jasady. Olardyń qatarynda Qazaqstan Suretshíler odaǵynyń tóraǵasy Ómírbek Jūbanıyazov, jazushy Kádírbek Segízbaı, aqyn Saule Dosjan, aktrısa Lıdıya Kádenova, Qazaqstannyń eńbek síńírgen artısí Gúljamal Qazaqbaeva, ánshíler Maqsat Bazarbaev, Baqyt Shadaeva, Óktem Altaev jáne taǵy basqa belgílí azamattar bar.
– Qūryltaı – eldíń bolashaǵyna qatysty mańyzdy máseleler talqylanatyn úlken alań. Sondyqtan ár azamat tańdauyna jauapkershílíkpen qarap, eldíń keleshegíne beı-jaı qaramauy kerek, – dedí Qazaqstannyń eńbek síńírgen artısí Aıjan Nūrmaǵambetova.
Qazaqstannyń halyq artısí Bıbígúl Tólegenova da azamattyq ūstanymyn bíldírdí. Qazaq óneríníń ańyz tūlǵasy úıínde dauys berdí. Osy maqsatta uchaskelík saılau komıssıyasynyń múshelerí onyń úıíne baryp, dauys beru rásímín tūrǵylyqty jerínde ūıymdastyrdy.
Bıbígúl Ahmetqyzy qansha jasqa kelse de, eldíń qoǵamdyq ómíríne beı-jaı qaramaıdy. Ol Qūryltaı deputattaryn saılauǵa qatysyp, tańdau jasady.
Megapolıstíń sportshylary da saılauǵa belsendí qatysty. 2026 jylǵy qysqy Olımpıada oıyndarynyń chempıony Mıhaıl Shaıdorov, bokstan álemníń úsh dúrkín chempıony Nazym Qyzaıbaı, Olımpıada júldegerlerí Islam Sátbaev, Aleksandra Le, Ǵūsman Qyrǵyzbaev pen Narıman Qūrbanov, gımnast Mılad Karımı, karateshí Dıdar Ámírálí, taekvondoshy Aıdana Qūmartaeva, sondaı-aq qysqy sport túrleríníń ókílderí Danıl Vasılev pen Ilya Mızernyh te tańdau jasady.
— Men úshín saılauǵa qatysu — ūstanymdy bíldíríp, el bolashaǵyna úles qosu múmkíndígí. Ár azamat tańdaudyń mańyzdy ekenín túsínuí kerek. Búgín saılau uchaskesíne kelíp, azamattyq boryshymdy oryndadym, — dedí Nazym Qyzaıbaı.
Sonymen qatar kóptegen saılau uchaskesínde dauys beru úderísí mádenı jáne sporttyq baǵdarlamalarmen qatar ótíp jatyr.
Kóptegen saılau uchaskesínde tūrǵyndar úshín futbol, voleıbol, shahmat, toǵyzqūmalaq, asyq atu jáne basqa da sport túrlerínen jarystar ūıymdastyryldy. Balalar men jastar arasynda sporttyq saıystar men otbasylyq estafetalar óttí.
Dauys beru uchaskeleríndegí shyǵarmashylyq atmosferany ánshíler men ónerpazdardyń kontsertterí men óner kórsetuí odan árí jandandyra tústí. Qalanyń ár audanynda saılaushylar úshín muzykalyq nómírler, shyǵarmashylyq baǵdarlamalar men ónerpazdarmen kezdesuler ūıymdastyrylǵan.
Saılau kúní Almatynyń barlyq audanyndaǵy dauys beru oryndarynyń mańynda ūıymdastyrylǵan mektep jármeńkelerí de tūrǵyndar kóp jınalǵan oryndardyń bíríne aınaldy. Kóptegen almatylyq dauys beruge kelíp, jańa oqu jylyna qajettí kerek-jaraq satyp aldy. Kúní boıy jármeńkelerde keńse tauarlary, mektepke qajettí qūral-jabdyqtar, sómkeler jáne oqu jylyna kerek basqa da zattar satyldy.
Mektep jármeńkelerímen qatar azyq-túlík jármeńkelerí de ūıymdastyryldy. Mūnda tūrǵyndar jańa písken nan-toqash, kókónís, jemís-jıdek jáne jergílíktí óndírushílerdíń ónímderín satyp aldy. Būl tūrǵyndarǵa dauys bergennen keıín úıge qajettí azyq-túlíktí bír jerden alyp ketuge múmkíndík berdí. Jármeńkelerde qala tūrǵyndary sauda jasap qana qoımaı, bír-bírímen kezdesíp, áńgímelesíp, uaqyt ótkízdí.
Jármeńke alańdary da jūmysyn jalǵastyruda. Bírqatar saılau uchaskesíníń mańynda mektep jáne azyq-túlík jármeńkelerí ūıymdastyrylǵan.
Qala tūrǵyndary jańa písken kókónís pen jemís-jıdek, nan-toqash ónímderín, jergílíktí óndírushílerdíń tauarlaryn, sondaı-aq jańa oqu jylyna qajettí mektep qūraldaryn satyp aldy. Keıbír saılau uchaskelerínde balalar shyǵarmashylyǵynyń kórmelerí men túrlí taqyryptyq alańdar jūmys ístedí. Tūrǵyndar oqushylardyń jūmysyn tamashalap, ınteraktıvtí ís-sharalarǵa qatysyp, otbasymen bírge uaqyt ótkíze aldy. Saılau uchaskelerínde almatylyqtardy erekshe keıípkerler de qarsy aldy. Solardyń bírí qalanyń tanymal sımvoldarynyń bíríne aınalǵan qar barysy.
Sondaı-aq saılau uchaskelerínde «Taza Qazaqstan» ekologıyalyq aktsıyasynyń boıtūmary Tazabektí de kezdestíruge boldy. Onyń beınesí jauapkershílík ár adamnyń ózínen bastalatynyn eske saldy. Būl qalany taza ūstauǵa ǵana emes, qoǵam ómíríne belsendí aralasyp, ortaq íske úles qosuǵa da qatysty.
Sondaı-aq qala tūrǵyndarynyń nazaryn Lıonel Messı men Krıshtıanu Ronaldudyń boıymen bírdeı kólemdegí fıguralary, Temírbek roboty jáne ózge de kreatıvtí keıípkerler audardy. Olar merekelík kóńíl kúı qalyptastyryp, kópshílíktíń estelík suretteríne arqau boldy.
Fotoaımaqtar Almatydaǵy saılau uchaskeleríndegí taǵy bír tanymal alańǵa aınaldy. Qala tūrǵyndary otbasymen, dostarymen jáne áríptesterímen bírge suretke túsíp, būl kúnníń erekshe atmosferasyn estelíkke saqtauǵa asyqty. Ásírese, ūlttyq naqyshta bezendírílgen taqyryptyq oryndar men túrlí erekshe keıípkerler qatysqan alańdar kópshílíktíń qyzyǵushylyǵyn tudyrdy. Olar kópshílíktíń estelík suretteríne arqau boldy.
Dauys beruge jastar da belsendí qatysty. Jas almatylyqtar būl kúnge shyǵarmashylyq tūrǵydan qarap, saılau uchaskeleríne barudy jarqyn árí este qalarlyq oqıǵaǵa aınaldyrdy. Kópshílígí erekshe obrazdarmen kelíp, taqyryptyq aktsıyalar men fleshmobtarǵa qatysyp, áleumettík jelílerde suretí men áserín belsendí bólístí.
Qala tūrǵyndarynyń nazaryn Almatynyń jas eko-reındjerlerí de audardy. 20-dan astam qatysushy dauys beruge velosıpedpen kelíp, ekologıyalyq taza ómír saltyn ūstanatynyn kórsettí. Būl erekshe aktsıya jastardyń qoǵamdyq belsendílíktí ekologıyalyq qūndylyqty nasıhattaumen ūshtastyryp júrgeníne aıqyn mysal boldy. Dauys beríp bolǵan soń olar qala kóshelerín velosıpedpen aralady.
Dauys beru kúní sáıkestíkpen de este qaldy. Almatyda Qūryltaı esímdí nebárí ekí adamnyń bar ekení anyqtaldy. Olar Qūryltaı Mansūrov pen Qūryltaı Sátkenbaev. Ekeuí de búgín dauys beríp, būl kúnníń mańyzyn atady.
Densaulyǵyna baılanysty nemese basqa da sebeptermen saılau uchaskesíne kele almaǵan azamattar úshín úıden dauys beru ūıymdastyryldy. Almatyda úıden dauys beruge qatysty ekí myńnan astam ótínísh túsíp, uchaskelík komıssıya múshelerí azamattardyń mekenjaıyna baryp, dauys berudí ūıymdastyrdy.
Saılau uchaskelerínde qoljetímdí orta qalyptastyruǵa da erekshe kóńíl bólíndí. Olar pandustarmen, taktıldí kórsetkíshtermen jáne erekshe qajettílígí bar adamdar úshín qajettí basqa da qūraldarmen jabdyqtalǵan.
Múmkíndígí shekteulí azamattar úshín dauys beru kúní ınvataksı qyzmetí de ūıymdastyrylyp, saılau uchaskesíne baryp-qaıtu tegín qamtamasyz etíldí. Būl múmkíndíktí paıdalanǵandardyń qatarynda Almaty qalasy Qoǵamdyq keńesíníń múshesí Bogdan Djepka da boldy.
Almatyda dauys beru kúní belsendí árí ūıymshyldyqpen óttí. Kúní boıy saılau uchaskeleríne qala tūrǵyndary toqtausyz keldí. Mūnda jasalǵan jaǵdaı ár azamatqa ózíníń saılau qūqyǵyn erkín júzege asyruǵa múmkíndík berdí.
Almatyda ótken Qūryltaı deputattarynyń saılauy qala tūrǵyndarynyń azamattyq belsendílígí men qoǵamdyq ómírge joǵary deńgeıde atsalysyp otyrǵanyn kórsetken mańyzdy qoǵamdyq-sayası oqıǵaǵa aınaldy.