Prezıdent jańa Konstıtutsıyany qabyldauǵa jurnalısterdíń qosqan úlesín joǵary baǵalady, – dep habarlaıdy aqshamnews.kz tílshísí.
Qasym-Jomart Toqaevtyń aıtuynsha, būqaralyq aqparat qūraldaryn ūlttyń úní, qoǵamnyń aınasy deuge tolyq negíz bar.
Óıtkení óz azamattarymyzben qatar, kúllí álem qauymdastyǵy elímízde jasalyp jatqan auqymdy ózgerísterdíń túpkí mánín, eń aldymen, otandyq medıa arqyly tanyp, bíledí.
– Būl tūrǵydan alǵanda, Qazaqstan jurnalısterí osy jauapkershílíktí tereń sezíníp, kásíbı míndetterín jemístí atqaruda. Nauryz aıynda bíz – bárímíz bír el bolyp, konstıtutsıyalyq reformany tabysty júzege asyrdyq. Jalpyūlttyq referendum kezínde halqymyz memlekettíń keleshegín aıqyndaıtyn tarıhı tańdauyn jasady. Elímízdíń bas qūjaty – jańa Konstıtutsıyamyz óz tūǵyryna qondy. Ata zańdy ázírleu jáne qabyldau ońaı sharua emes ekení anyq. Būl – bírlígí bekem, ruhy bıík jáne jarqyn bolashaqqa degen senímí zor ūlttyń ǵana qolynan keletín bíregeı qadam. Bíz osy maqsatqa jetu úshín ūzaq joldy júríp óttík. Arnaıy Konstıtutsıyalyq komıssıya qūryp, Negízgí zańnyń ár babyn el múddesí tūrǵysynan mūqıyat saraladyq. Búkíl jūrtty bír mūratqa ūıystyrǵan ortaq íste medıa salasy mamandarynyń mańyzdy ról atqarǵanyn erekshe atap ótu qajet. Jurnalıster qauymy Konstıtutsıyalyq komıssıyanyń qyzmetí turaly sapaly jáne mazmūndy habarlar taratty. Sondaı-aq Ata zańǵa engízu úshín ūsynylǵan túzetulerge qatysty jan-jaqty taldau jūmysyn júrgízdí. Nauqan kezíndegí tíkeleı efırler, saraptamalyq materıaldar men tanymdyq sūhbattar – sonyń aıqyn dálelí. Jalpy, jurnalıster óz kásíbılígín tolyǵymen kórsettí. Osy salada naǵyz kásíbı maman bolu degenímíz – «qoldan jasalǵan» aıqaı-shu nemese dańǵaza jasau emes, būl – eń aldymen ózektí máselení jan-jaqty bílu jáne taqyrypty jetík meńgeru degen sóz. Komıssıya otyrysynyń áleumettík jelídegí efırlerí de mıllıonnan astam qaralym jınady. Osylaısha, Ata zań jobasyn talqylau jalpyūlttyq deńgeıdegí píkírtalasqa ūlasty. Būl íske elge janashyr azamattarymyz túgel qatysty. Máselen, «e-Government» jáne «e-Ótínísh» tsıfrlyq júıesí arqyly myńdaǵan ótínísh kelíp tústí. Túptep kelgende, mūnyń bárí «Halyq úníne qūlaq asatyn memleket» tūjyrymdamasynyń naqty kórínísí ekení sózsíz. Konstıtutsıyalyq komıssıya múshelerí salmaqty árí ūtymdy ūsynystardyń eshqaısysyn nazardan tys qaldyrǵan joq, onyń bárí mūqıyat zerdelendí. Bas qūjattyń jobasyn daıyndau jáne ony talqylau tájírıbesí memleket pen azamattardyń qarym-qatynasyn múldem jańa deńgeıge kóterdí. Komıssıya qūramynda mass-medıanyń bedeldí ókílderí de boldy. Sondyqtan jurnalıster qauymyn jańa Ata zańymyzdyń teń avtorlarynyń bírí dep aıtsaq, qate bolmaıdy, – dedí Prezıdent.