Almatyda «Open Healthcare Kazakhstan» JShS men Almaty qalasy Turızm basqarmasynyń bírlesken ūıymdastyruymen Qazaqstan–Koreya medıtsınalyq turızmíne arnalǵan semınar óttí, – dep habarlaıdy aqshamnews.kz tílshísí.
Ís-sharaǵa Qazaqstan men Koreya Respublıkasynyń medıtsınalyq ūıymdarynyń ókílderí, turoperatorlar jáne sala sarapshylary qatysty.
Semınar barysynda qatysushylar Ońtústík Koreyanyń zamanauı medıtsınalyq tehnologıyasy jáne qyzmetterímen tanysyp, profılaktıkalyq dıagnostıka (check-up) máselesín, sondaı-aq medıtsınalyq turızmdí damytu jáne halyqaralyq yntymaqtastyqty keńeıtu múmkíndíkterín talqylady.
«Búgínde Almaty Ortalyq Azıyadaǵy úzdík medıtsınalyq ortalyqtardyń bírí retíndegí ornyn nyǵaıtyp keledí. Halyqaralyq yntymaqtastyqty damytu jáne sheteldík seríktestermen tájírıbe almasu medıtsınalyq turızmdí damytuǵa árí qalanyń tartymdylyǵyn arttyruǵa jańa múmkíndíkter ashady», – dedí Almaty qalasy Turızm basqarmasy basshysynyń orynbasary Aqmaral Eshchanova.
Ís-shara ayasynda Almaty qalasy Turızm basqarmasy men «Open Healthcare Kazakhstan» JShS yntymaqtastyq turaly memorandumǵa qol qoıdy. Qūjat medıtsınalyq turızmdí damytuǵa, Almatynyń turıstík jáne medıtsınalyq áleuetín ílgeríletuge, sondaı-aq osy saladaǵy bírlesken bastamalardy júzege asyruǵa baǵyttalǵan.
Semınarda qazaqstandyqtardyń Koreya Respublıkasynda medıtsınalyq qyzmet alu múmkíndíkterí turaly habardarlyǵyn arttyruǵa, ekí eldíń salalyq ūıymdary arasyndaǵy seríktestík baılanysty nyǵaıtuǵa jáne ózara yntymaqtastyqty damytuǵa erekshe nazar audaryldy.
Ís-shara barysynda jarıyalanǵan málímetterge sáıkes, Qazaqstanda medıtsınalyq turızm salasy tūraqty ósím kórsetude. Eger 2022 jyly elímízge shamamen 1,3 myń sheteldík patsıent kelgen bolsa, 2024–2025 jyldary būl kórsetkísh 80 myń adamǵa juyqtaǵan.
Osyndaı ís-sharalardyń ótkízíluí Qazaqstan men Ońtústík Koreya arasyndaǵy yntymaqtastyqty nyǵaıtuǵa, medıtsınalyq turızmdí damytuǵa jáne Almatyny óńírlík medıtsınalyq qyzmet kórsetu ortalyǵy retínde tanytuǵa yqpal etedí.