Almatyda áleumettík kásípkerlíktí qoldau sharalary keńeıtílíp keledí, – dep habarlaıdy aqshamnews.kz tílshísí.
Almatyda áleumettík kásípkerlerge arnalǵan qoldau tetíkterí keńeıtílíp keledí. Olar jeńíldetílgen shartpen ǵımaratty jalǵa alu, bıznestí damytuǵa qarjylaı qoldau jáne aınalym qarajatyn tolyqtyruǵa arnalǵan jeńíldetílgen nesıe ala alady. Būl turaly «Almaty» áleumettík-kásípkerlík korporatsıyasynyń ókílderí habarlady.
Qoldaudyń negízgí baǵyttarynyń bírí – áleumettík kásípkerlerge tūrǵyn emes úı-jaılardy jeńíldetílgen sharttarmen ūsynu. Nysandar korporatsıyanyń teńgerímíne ótken saıyn konkurstyq negízde beríledí. Jalǵa alu qūnynyń jeńíldetílgen mólsherlemesí – bír sharshy metr úshín 0,1 aılyq eseptík kórsetkísh (AEK). Jalǵa beru merzímí – úsh jylǵa deıín, keıín ony ūzartu múmkíndígí qarastyrylǵan. Sonymen qatar kásípkerlerge jóndeu jūmystaryn júrgízu úshín úsh aıǵa deıín jaldau aqysy eseptelmeıtín jeńíldík kezeńí ūsynylady.
Osy qoldau tetígíníń tıímdí júzege asuynyń bír mysaly «RUH» beıímdeu, ońaltu jáne abılıtatsıya ortalyǵy. 2023 jyly baıqau qorytyndysy boıynsha ortalyqqa audany 107 sharshy metr bolatyn ǵımarat berílíp, erekshe qajettílígí bar azamattarǵa kómek kórsetu jūmysy ūıymdastyryldy. Keıín «Almaty» ÁKK-níń qoldauymen nysandy jańǵyrtuǵa jeke ınvestor tartylyp, kúrdelí jóndeu júrgízíldí. Sonyń nátıjesínde áleumettík qyzmet kórsetuge jaıly jaǵdaı jasaldy.
Búgínde ortalyq erekshe qajettílígí bar adamdarǵa, onyń íshínde psıhıkalyq damu erekshelíkterí bar azamattarǵa ońaltu, oqytu jáne áleumettík beıímdeu qyzmetterín ūsynady. Mūnda ákímshí, áleumettík reabılıtolog, art-terapevt, psıholog jáne defektolog jūmys ísteıdí. Ortalyq basshysynyń tūraqty qamqorlyǵynda psıhıkalyq múgedektígí bar 27 jetím bala bar. Jalpy joba íske qosylǵaly berí shamamen 350 adam ońaltu kursynan ótken.
«Almaty» ÁKK júzege asyryp otyrǵan múlíktík qoldau tetígíníń arqasynda búgínde 36 áleumettík kásípker qajettí ǵımaratpen qamtamasyz etílíp, 226 tūraqty jūmys orny ashyldy. Qoldau áleumettík beıímdeu, bílím beru, ońaltu jáne mamandandyrylǵan qyzmet kórsetu baǵyttaryndaǵy jobalardy qamtıdy.
Áleumettík kásípkerler úshín qosymsha qoldau múmkíndíkterí «Almaty Business – 2030» óńírlík kásípkerlíktí damytu baǵdarlamasy ayasynda da qarastyrylǵan. Baǵdarlama sheńberínde kepílzatsyz, jyldyq 6 paıyzdyq mólsherlememen bes jylǵa deıíngí merzímge arnaıy jeńíldetílgen nesıe ónímí ūsynylady.
Qarjylandyru negízgí qūraldardy satyp aluǵa jáne jóndeuge, sondaı-aq aınalym qarajatyn tolyqtyruǵa baǵyttalady. Baǵdarlamanyń operatory – «Almaty» mıkroqarjy ūıymy» JShS.