Qazaqstan Respublıkasy Ortalyq saılau komıssıyasynyń aldyn ala derekteríne sáıkes, Almaty tūrǵyndarynyń referendumǵa qatysu kórsetkíshí 33,43 paıyz. Būl 2020 jyldan berí ótkízílgen referendumdarmen salystyrǵanda joǵary nátıje bolyp otyr, – dep habarlaıdy aqshamnews.kz tílshísí.
Qazaqstannyń jańa Konstıtutsıyasyn qabyldauǵa arnalǵan referendum ayaqtaldy. Almatyda tańerteńnen bastap qala tūrǵyndary dauys beruge belsendí qatysyp, būl nauqanǵa úlken qyzyǵushylyq tanytty. Kóptegen saılau uchaskesínde kelushílerdí muzykamen jáne túrlí shaǵyn kórínístermen qarsy alyp, merekelík atmosfera qalyptasty.
Qala aumaǵynda saǵat 07:00-den bastap 653 saılau uchaskesí ashyldy. Alǵashqy saǵattardyń ózínde bírqatar uchaskede dauys beruge kelgen tūrǵyndardyń kezegí baıqaldy.
Keıbír uchaskede saılaushylardy ūlttyq kıím kıgen adamdar men ūzyn boıly quyrshaqtar qarsy alyp, fotosuretke túsuge arnalǵan aımaqtar ūıymdastyryldy, muzyka oınady. Mysaly, «Ájeler horynyń» múshelerí halyq ánderín shyrqap, dástúrlí shashu rásímín ótkízdí. Mūndaı sharalar dauys beru barysyna erekshe reńk beríp, qala tūrǵyndary estelík suretter túsíríp, áserín áleumettík jelílerde bólístí. Sonymen qatar erekshe kostyum kıíp kelgen kreatıvtí saılaushylar da kópshílíktíń nazaryn audardy. Olardyń arasynda Almaty barysy Ádílettíń, Supermenníń, Temír adamnyń, Djokerdíń, pıngvınníń jáne «Threads» áleumettík jelísíníń beınesín tańdaǵandar boldy.
Almaty qalasynyń ákímí Darhan Satybaldy da qalanyń bír saılau uchaskesínde dauys berdí. Sonymen qatar kommunaldyq jáne ónerkásíptík kásíporyndardyń qyzmetkerlerí, qūrylys kompanıyalarynyń ūjymdary jáne túrlí bıznes salasynyń ókílderí de belsendílík tanytty.
Referendumǵa qoǵam qaıratkerlerí, mádenıet jáne sport salasynyń tanymal ókílderí de qatysty. Ánshíler, muzykanttar, teatr jáne kıno akterlerí, sondaı-aq ardagerler men Qazaqstannyń eńbek síńírgen qaıratkerlerí azamattyq boryshyn oryndady. Olardyń kópshílígí dauys beruge otbasylarymen kelíp, ár azamattyń el bolashaǵyna qatysuynyń mańyzyn atap óttí. Jastar da belsendílík tanytyp, kóptegen almatylyq alǵash ret dauys beríp, būl sáttí áleumettík jelílerde bólístí.
Referendum kúní qala ákímdígí qoǵamdyq kólíkte tegín jol júrudí ūıymdastyrdy. Kóru qabíletí būzylǵan azamattar úshín Braıl qarpímen jasalǵan arnaıy trafaretter daıyndalyp, dauys beru kabınalary erekshe qajettílígí bar adamdarǵa beıímdeldí. Múmkíndígí shekteulí tūrǵyndarǵa «Invataksı» qyzmetí ūsynyldy. Al egde jastaǵy azamattar úıínde arnaıy jyljymaly jáshík arqyly dauys bere aldy.
Jalpy alǵanda, dauys beru barysy tynysh árí ūıymdasqan jaǵdaıda óttí. Ártúrlí qoǵamdyq ūıymdardyń baqylaushylary eshqandaı zańbūzushylyqtar tírkelmegenín habarlady.